औषधी भवन: केमिस्ट बांधवांसाठी की इतरांसाठी? संघटनेतील पारदर्शकतेचा अभाव: केमिस्ट बांधवांची नाराजी

दैनिक चालु वार्ता उदगीर प्रतिनिधी -अविनाश देवकते

लातूर :लातूर जिल्ह्यातील केमिस्ट बांधवांनी 2008 साली एक महत्त्वाचा उपक्रम हाती घेतला होता. जिल्ह्यातील Maharashtra State Retail & Chemist Druggist Association (MSRCDA) च्या सर्व सदस्य केमिस्ट बांधवांनी एकत्र येत औषधी भवनाची संकल्पना प्रत्यक्षात आणली. केमिस्ट बांधवांसाठी वैद्यकीय कार्ये, कार्यालयीन कामे आणि अन्य सुविधा उपलब्ध करून देण्याच्या उद्देशाने हा प्रकल्प राबवण्यात आला.

औषधी भवन उभारणीसाठी स्वर्गीय बोधकुमार चापशी आणि जिल्ह्यातील इतर पदाधिकारी यांनी विशेष पुढाकार घेतला. जिल्ह्यातील सुमारे 1100 सदस्यांनी सभासद नोंदणी करून या उपक्रमात सहभाग घेतला आणि हे भवन उभे राहिले. उद्घाटनाचा सोहळा स्वर्गीय माजी मुख्यमंत्री विलासराव देशमुख यांच्या हस्ते संपन्न झाला होता. सुरुवातीच्या काळात औषधी भवनाचा उपयोग सामाजिक कार्यांसाठी होत होता. कमी दरात भाड्याने देऊन केमिस्ट बांधवांना त्याचा फायदा मिळावा, असा मुख्य उद्देश होता.

औषधी भवनाचा उपयोग केमिस्ट बांधवांना न झाल्याची खंत

गेल्या 17 वर्षांपासून हे औषधी भवन विविध कार्यांसाठी वापरण्यात येत आहे. परंतु, काही ठराविक लोकांच्या ताब्यात या भवनाचे नियंत्रण गेल्याचा आरोप काही केमिस्ट बांधवांकडून केला जात आहे. अनेक दुकाने उपलब्ध असतानाही केमिस्ट होलसेल व्यावसायिकांना येथे संधी न मिळाल्याने नाराजी व्यक्त होत आहे. औषधी भवनाचा उपयोग केमिस्ट बांधवांसाठी होण्याऐवजी ते दवाखान्यांना भाड्याने देण्यात आले, अशी भावना अनेक केमिस्ट बांधवांमध्ये आहे.

कोविड काळातील अडचणी आणि नुकसान

कोविड-19 महामारीच्या काळात संपूर्ण देशावर गंभीर परिणाम झाला. या संकटाचा मोठा फटका औषध व्यवसायालाही बसला. अनेक केमिस्ट बांधवांना प्रचंड आर्थिक तोटा सहन करावा लागला. या कठीण काळात औषधी भवनाचा उपयोग केमिस्ट बांधवांना मदत करण्यासाठी व्हायला हवा होता, असे मत काही सदस्यांनी व्यक्त केले. त्याचदरम्यान स्वर्गीय बोधकुमार चापशी यांचे निधन झाले, ज्यामुळे संघटनेच्या पुढील दिशा आणि धोरणांवरही परिणाम झाला.

केमिस्ट बांधव एकत्र येण्याची गरज

आज स्थिती अशी आहे की, औषधी भवन केमिस्ट बांधवांसाठी उपयोगी ठरण्याऐवजी केवळ संघटनेच्या पदाधिकाऱ्यांच्या अखत्यारीत राहिले आहे. केमिस्ट बांधवांना याचा योग्य उपयोग करता यावा, यासाठी सर्व केमिस्ट एकत्र येण्याची आवश्यकता आहे. भविष्यात हे भवन केमिस्ट बांधवांच्या व्यवसायवृद्धीसाठी आणि त्यांच्या गरजांसाठी कसे वापरले जाऊ शकते, याबाबत स्पष्ट धोरण ठरवण्याची गरज आहे.

लातूर जिल्ह्यातील अनेक केमिस्ट व्यावसायिकांनी MSRCDA संघटनेतील पारदर्शकतेवर प्रश्न उपस्थित केले असून, भवनाचा मुख्य उद्देश पाळला जात आहे का, यावर विचार करण्याची गरज आहे. केमिस्ट बांधवांनी एकत्र येऊन या विषयावर तोडगा काढल्यास भविष्यात औषधी भवनाचा उपयोग अधिक परिणामकारक पद्धतीने होऊ शकेल.

______________________________

१७ वर्षांपूर्वीचा संकल्प मार्गी लागला, पण उद्देश पूर्ण झाला का?

______________________________