आरोपीचे आणि तरुणीचे संमतीने संबंध झाले असून तो गुन्हा नाही !

जामीन अर्जात वकिलांचा दावा…

पुणे: स्वारगेट अत्याचार प्रकरणातील आरोपी दत्तात्रय गाडेच्या न्यायालयीन कोठडीत वाढ करण्याचे आदेश न्यायालयाने दिले आहेत. मात्र, आरोपीच्या वकिलांनी न्यायालयात जामीनासाठी अर्ज दाखल केला आहे.

शारीरिक संबंध वेळ हा वैद्यकीयरित्या प्रश्नचिन्ह निर्माण करणारा असून, पीडितेच्या जबाबानुसार तिने नमूद केलेल्या घटनाक्रमानुसार जबरदस्ती करणे तसेच त्यानंतर संभोग करणे अशक्य वाटते. यावरून हे सिद्ध होते की पीडिता व आरोपी यांच्यात जे काही संबंध झाले हे दोघांच्या संमतीने झाले आणि संमतीने झालेले संबंध हा कुठलाही गुन्हा नाही, असे जामीन अर्जात नमूद करण्यात आले आहे.

२५ फेब्रुवारी रोजी स्वारगेट आगारातील बंद असलेल्या शिवशाही बसमध्ये एका २६ वर्षीय तरुणीवर अत्याचार झाल्याची घटना घडली होती. या घटनेनंतर राज्यभरात मोठी खळबळ उडाली होती. या अत्याचार प्रकरणातील आरोपी दत्तात्रय गाडेला पोलिसांनी शिरुर तालुक्यातील गुनाट गावातील एका शेतातून गावकऱ्यांच्या मदतीने अटक केली. यानंतर स्वारगेट पोलिसांनाकडून हे प्रकरण पुणे गुन्हे शाखेकडे वर्ग करण्यात आले. पोलिसांनी गाडेची कसून चौकशी केली. सुरुवातील गाडेला पोलिस कोठडीत ठेवण्याचे आदेश न्यायालयाने दिले. त्यानंतर त्याची रवावनी न्यायालयीन कोठडीत करण्यात आली. त्यानंतर त्याच्या न्यायालयीन कोठडीत वाढ करण्याचे आदेश न्यायालयाने दिले आहेत.

दरम्यान, आरोपी गाडे याचे वकील वाजिद खान-बिडकर यांनी गाडेच्या जामिनासाठी न्यायालयात अर्ज केला आहे. स्वारगेट बस आगारात जागोजागी सीसीटीव्ही कॅमेरे लावण्यात आले आहेत. अद्यापही या प्रकरणात हे फुटेज दाखल करण्यात आलेले नाही. या फुटेजवरुन आरोपीने कुठल्याही प्रकारचे गैरकायदेशीर कृती केली नाही हे सिद्ध होते. येथून फलटणला जाण्यासाठी सकाळी ५ वाजल्यापासून दर एका तासाला बस आहे. फिर्यादी ही वेळोवेळी गावी (फलटण) जात असे आणि म्हणून दर तासाला फलटणसाठी गाडी आहे हे माहिती असूनसुद्धा फिर्यादी अनोळखी माणसासोबत जाणे ही बाब अशक्य आहे असे जामीन अर्जात नमूद करण्यात आले आहे.