दै चालु वार्ता 
नांदूर नाका येथील राहुल धोत्रे हत्या प्रकरणात पोलिसांना शरण आलेले भाजपचे माजी नगरसेवक उद्धव निमसे यांना जिल्हा न्यायालयाने २० सप्टेंबरपर्यंत पोलीस कोठडी सुनावली. मागील महिन्यात ही घटना घडली होती.
तेव्हापासून संशयित निमसे हे फरार होते. सोमवारी ते शरण आले.
नांदूर नाका परिसरात २२ ऑगस्ट रोजी किरकोळ वादातून मारहाणीची घटना घडली होती. टोळक्याने अजय कुसाळकर (२७) आणि राहुल धोत्रे यांच्यावर हल्ला केला होता. यात राहुल धोत्रे या युवकाचा मृत्यू झाला. या प्रकरणी आडगाव पोलीस ठाण्यात गुन्हा दाखल झाल्यानंतर काही जणांना पोलिसांनी अटक केली. परंतु, संशयित भाजपचे माजी नगरसेवक उद्धव निमसे हे फरार होते.
शहरातील वाढत्या गुन्हेगारी विरोधात शिवसेना (उद्धव ठाकरे) आणि मनसेने अलीकडेच काढलेल्या मोर्चात पंचवटीतील राहुल धोत्रे हत्या प्रकरणातील संशयित भाजपचे माजी नगरसेवक निमसे हे फरार असल्याकडे लक्ष वेधण्यात आले होते. फरार असताना संशयित निमसे मंत्री गिरीश महाजन यांना भेटल्याचा आरोप खासदार संजय राऊत यांनी केला होता. या घडामोडीनंतर फरार असणारे निमसे हे पोलिसांना शरण आले. उपरोक्त प्रकरणात त्यांना अटक झाल्यानंतर जिल्हा न्यायालयात हजर करण्यात आले. न्यायालयाने निमसे यांना पाच दिवसांची पोलीस कोठडी सुनावल्याची माहिती सूत्रांनी दिली.
प्रकरण काय ?
नांदूर नाका परिसरात २२ ऑगस्ट रोजी मारहाणीची घटना घडली होती. निमसे यांच्या मुलांशी सनी धोत्रे या युवकाचे किरकोळ वाद झाले होते. त्यानंतर उद्धव निमसे यांनी तक्रारदार आकाश धोत्रेला दमदाटी करत जमावाला चिथावणी दिल्याचा आरोप तक्रारीत करण्यात आला आहे. टोळक्याने पाठलाग करत लाकडी दांडके, हत्यारांनी अजय कुसाळकर (२७) आणि तक्रारदाराचा भाऊ राहुल धोत्रे यांच्यावर हल्ला केला. यात राहुल आणि अजय दोघे गंभीर जखमी झाले. उपचारादरम्यान जखमी राहुल धोत्रे या युवकाचा मृत्यू झाला. या प्रकरणी आडगाव पोलीस ठाण्यात उद्धव निमसे यांच्यासह अन्य काही जणांविरुध्द गुन्हा दाखल आहे.
