सेवानिवृत्त शिक्षकांऐवजी बेरोजगार तरुणांना संधी द्या – संभाजी ब्रिगेडची तहसीलदार व उपविभागीय अधिकाऱ्यांकडे ठाम मागणी

दैनिक चालु वार्ता उदगीर प्रतिनिधी-अविनाश देवकते

लातूर (उदगीर) :

सेवानिवृत्त शिक्षकांना मानधनावर पुन्हा नेमणूक न देता, शिक्षण घेतलेल्या बेरोजगार तरुणांना नोकरीच्या संधी द्याव्यात, अशी ठाम मागणी संभाजी ब्रिगेडच्या वतीने तहसीलदार व उपविभागीय अधिकारी, उदगीर यांना निवेदनाद्वारे करण्यात आली.

निवेदनात काय नमूद केले आहे?

दिनांक 26 जून 2025 रोजी देण्यात आलेल्या निवेदनात म्हटले आहे की, शिक्षणमंत्री दादासाहेब भुसे यांनी जिल्हा परिषद, नगरपालिका, महानगरपालिका शाळांमध्ये मानधन तत्वावर सेवानिवृत्त शिक्षकांची पुन्हा नेमणूक करण्यास परवानगी दिली आहे. हे धोरण ग्रामीण भागातील शिक्षित बेरोजगार तरुणांच्या रोजगाराच्या संधी हिरावून घेणारे ठरत आहे.

तरुणांच्या आत्महत्यांचे वास्तव आणि शासनाची जबाबदारी

निवेदनात पुढे नमूद करण्यात आले आहे की, आज अनेक तरुण डी.एड., बी.एड. होऊनही नोकरीपासून वंचित आहेत. बेरोजगारीमुळे आत्महत्येचे प्रमाणही वाढले आहे. त्यामुळे शासनाने याकडे गांभीर्याने लक्ष देत, सेवानिवृत्त शिक्षकांना शिक्षकी सेवेपासून दूर ठेवावे आणि त्यांना जनगणना, सामाजिक कामे यामध्ये सहभागी करून घ्यावे, अशी विनंती करण्यात आली आहे.

“खाजगी शाळा मानधनावर शिक्षक घेत नाहीत, मग सरकारी शाळा का घेतात?”

संभाजी ब्रिगेडने प्रश्न उपस्थित केला की, खाजगी शाळा सेवानिवृत्त शिक्षकांना मानधनावर पुन्हा सेवेत घेत नाहीत, मग शासनाने असा अन्याय का करावा? नवतरुणांना रोजगाराची संधी देणे ही शासनाची प्राथमिक जबाबदारी आहे. निवृत्त शिक्षकांनी आता घरी राहून नातवंडांची काळजी घ्यावी, असेही स्पष्टपणे निवेदनात नमूद करण्यात आले आहे.

अन्यथा तीव्र आंदोलनाचा इशारा

संभाजी ब्रिगेडने शासनाला तीव्र आंदोलनाचा इशारा देत सांगितले की, जर ही मागणी मान्य झाली नाही, तर महाराष्ट्रभर तीव्र आंदोलन छेडले जाईल. शिक्षणमंत्री व संबंधित विभागांनी ही बाब गांभीर्याने घ्यावी व तातडीने योग्य निर्णय घ्यावा, अशी मागणी करण्यात आली आहे.

या वेळी संभाजी ब्रिगेडचे जिल्हाध्यक्ष शिवश्री राजकुमार माने, जिल्हा सचिव शिवश्री मोहनेश्र्वर विश्रकर्मा, विधानसभा अध्यक्ष उत्तम फड, जिल्हा कार्याध्यक्ष शिवश्री बाळासाहेब चिंचोलीकर, तालुका अध्यक्ष शिवश्री राजकुमार भालेराव, तसेच शिवश्री सुरज आटोळकर, मनोहर हिंडे, विजय पाटील, करण बिरादार आदी कार्यकर्ते उपस्थित होते.

—

शिक्षण व्यवस्थेमध्ये युवकांना संधी देऊन बेरोजगारीचा प्रश्न कमी करण्यासाठी सेवानिवृत्त शिक्षकांना पुन्हा नेमणूक न देण्याची मागणी सध्या जोर धरत असून, संभाजी ब्रिगेडच्या वतीने दिलेले हे निवेदन आता शासनाच्या भूमिकेकडे लक्ष वेधणारे ठरत आहे.