फीनिक्स प्रशालेत ‘आनंदी बाजार’ उत्साहात संपन्न; चिमुकल्या व्यापाऱ्यांनी लुटला व्यवहाराचा आनंद

सांगोला प्रतिनिधी -दिगंबर लवटे

महुद बु॥:

विद्यार्थ्यांमध्ये व्यावहारिक ज्ञान, संवाद कौशल्य आणि आर्थिक साक्षरता वाढीस लागावी या उद्देशाने येथील फीनिक्स प्रशालेत ‘आनंदी बाजार’ (बाल आनंद मेळावा) मोठ्या उत्साहात संपन्न झाला. या उपक्रमात विद्यार्थ्यांनी विविध भाजीपाला व फळे,खाद्यपदार्थांचे आणि वस्तूंचे स्टॉल्स लावून आपल्यातील व्यावसायिक कौशल्याचे दर्शन घडवले.

कार्यक्रमाचे स्वरूप या आनंदी बाजाराचे उद्‌घाटन संस्थेचे अध्यक्ष मा. येडगे सर तसेच शाळा व्यवस्थापन समितीच्या अध्यक्षा सौ .धांडोरे मॅडम तसेच तिन्ही विभागाचे विभाग प्रमुख शिक्षक व पालक वर्ग यांच्या समवेत करण्यात आले.

प्रशालेच्या पटांगणात आयोजित या बाजारात विद्यार्थ्यांनी स्वतः तयार केलेले पौष्टिक पदार्थ, हस्तकला वस्तू आणि खेळण्यांची दुकाने थाटली होती. यामध्ये प्रामुख्याने भेळ, पाणीपुरी, सँडविच, फळांचे रस, घरगुती मिठाई आणि फळे भाजीपाला विविध चटपटीत पदार्थांच्या स्टॉल्सना पालकांनी मोठी गर्दी केली होती. या कार्यक्रमाचे

प्रमुख वैशिष्ट्ये म्हणजे

व्यावहारिक शिक्षण: विद्यार्थ्यांनी स्वतः वस्तूंच्या किमती ठरवणे, ग्राहकांशी संवाद साधणे आणि पैशांचा हिशोब ठेवणे या गोष्टी प्रत्यक्ष अनुभवातून शिकल्या.

पालकांचा प्रतिसाद: शाळेच्या या उपक्रमाचे पालकांनी भरभरून कौतुक केले. मुलांच्या कलागुणांना वाव देणारा हा एक स्तुत्य उपक्रम असल्याची भावना पालकांनी व्यक्त केली.

सांस्कृतिक वातावरण: बाजारभर चाललेली मुलांची आरडाओरड, आकर्षक सजावट आणि ग्राहकांना आकर्षित करण्याची त्यांची पद्धत यामुळे शाळेला एका मोठ्या बाजाराचे स्वरूप प्राप्त झाले होते.

प्रशालेची भूमिका:

या प्रसंगी शाळेचे मुख्याध्यापक आणि शिक्षक वृंदाने विद्यार्थ्यांना मार्गदर्शन केले. केवळ पुस्तकी ज्ञान न देता मुलांना दैनंदिन जीवनातील व्यवहारांची ओळख व्हावी, हा या ‘आनंदी बाजारा’चा मुख्य हेतू असल्याचे शाळेच्या वतीने सांगण्यात आले. कार्यक्रमाच्या यशस्वीतेसाठी सर्व शिक्षकांनी आणि शिक्षकेतर कर्मचाऱ्यांनी विशेष परिश्रम घेतले.