आरोग्यमंत्री प्रकाश आबिटकर यांची हेमलकसा येथे लोकबिरादरी प्रकल्पाला भेट तब्बल ५२ वर्षे प्रकल्पातून गोरगरीब आदिवासी समाजाला आरोग्य, शिक्षण सेवा

जिल्हा प्रतिनिधी गडचिरोली:जगदीश वेन्नम

गडचिरोली, दि. १३ : राज्याचे सार्वजनिक आरोग्य व कुटुंब कल्याण मंत्री प्रकाश आबिटकर यांनी आज भामरागड तालुक्यातील हेमलकसा येथील लोकबिरादरी प्रकल्पाला भेट देऊन पद्मश्री डॉ. प्रकाश आमटे यांची सदिच्छा भेट घेतली. या भेटीदरम्यान त्यांनी प्रकल्पांतर्गत रुग्णालय, निवासी आश्रमशाळा आणि आदिवासी भागासाठी राबविण्यात येणाऱ्या विविध आरोग्य व सामाजिक उपक्रमांची सविस्तर पाहणी केली.

यावेळी आरोग्यमंत्री आबिटकर यांनी उच्च शिक्षण घेऊन डॉक्टर झाल्यानंतर इतक्या दुर्गम व नक्षलग्रस्त आदिवासी भागात सेवा देण्याची प्रेरणा कशी मिळाली, अशी विचारणा डॉ. आमटे यांना केली. त्यावर उत्तर देताना डॉ. आमटे यांनी सांगितले की, गेली तब्बल ५२ वर्षे लोकबिरादरी प्रकल्पाच्या माध्यमातून गोरगरीब आदिवासी समाजाला आरोग्य, शिक्षण व मानवतावादी सेवा देण्याचे कार्य सुरू आहे. प्रारंभीच्या २२ वर्षांत या भागात वीज सुविधा देखील उपलब्ध नव्हती, तरीही अत्यंत प्रतिकूल परिस्थितीत सेवा अखंडपणे सुरू ठेवली, असे त्यांनी नमूद केले.

प्रकल्पामध्ये शासनाच्या विविध आरोग्य योजना प्रभावीपणे राबविल्या जातात का, तसेच शासनाकडून आणखी कोणत्या प्रकारची मदत अपेक्षित आहे, याबाबत मंत्री महोदयांनी सविस्तर चर्चा केली. यावेळी सर्पदंशावरील औषधोपचारासाठी विशेष सवलत व अधिक सक्षम सुविधा उपलब्ध करून देण्याची अपेक्षा डॉ. आमटे यांनी व्यक्त केली. भामरागड परिसरात सर्पदंशाच्या घटना वारंवार घडत असल्याने या संदर्भातील औषधे व उपचार व्यवस्थेला अधिक बळ देण्याची गरज त्यांनी अधोरेखित केली.

या भेटीत डॉ. प्रकाश आमटे यांच्या पत्नी मंदाकिनी आमटे तसेच लोकबिरादरी प्रकल्पातील सदस्यांशी संवाद साधण्यात आला. स्थानिक आरोग्य व्यवस्थेतील अडचणी, दुर्गम भागातील रुग्णवाहिका सेवा, औषधसाठा, तज्ज्ञ डॉक्टरांची उपलब्धता आदी विषयांवर सखोल चर्चा झाली. आरोग्यमंत्री आबिटकर यांनी स्थानिक नागरिकांची आरोग्यविषयक निवेदने स्वीकारून त्यावर सकारात्मक कार्यवाही करण्याचे आश्वासन दिले.

यानंतर मंत्री महोदयांनी भामरागड ग्रामीण रुग्णालय व अहेरी उपजिल्हा रुग्णालयाला भेट देऊन तेथील पायाभूत सुविधा, रुग्णसेवा, उपलब्ध मनुष्यबळ आणि औषधसाठ्याचा आढावा घेतला. दुर्गम व आदिवासी भागातील आरोग्य सेवा अधिक सक्षम करण्यासाठी शासन कटिबद्ध असल्याचे त्यांनी यावेळी स्पष्ट केले.

यावेळी आरोग्य विभागाचे संचालक डॉ विजय कंदेवाड, सहसंचालक रामजी आडकीकर, उपविभागीय अधिकारी अमर राऊत, आरोग्य उपसंचालक डॉ .शशीकांत शंभरकर, डॉ. अंबादास देवमाने, जिल्हा शल्य चिकित्सक डॉ वर्षा लहाडे, जिल्हा आरोग्य अधिकारी डॉ प्रताप शिंदे व इतर अधिकारी उपस्थित होते

लोकबिरादरी प्रकल्प हेमलकसा हा बाबा आमटे यांनी २३ डिसेंबर १९७३ रोजी गडचिरोली जिल्ह्यातील भामरागड तालुक्यातील आदिवासींच्या (माडिया गोंड) विकासासाठी स्थापन केलेला प्रकल्प आहे. हेमलकसा येथे डॉ. प्रकाश आमटे आणि डॉ. मंदाकिनी आमटे यांच्या नेतृत्वात रुग्णालय, शाळा आणि वन्यजीव अनाथालय चालवून आदिवासींना आरोग्य व शिक्षण सेवा मोफत दिली जाते

उद्देश: माडिया गोंड आदिवासी जमातीचे सबलीकरण, आरोग्य, आणि शिक्षण.

प्रमुख उपक्रम:शिक्षण (लोकबिरादरी आश्रम शाळा): आदिवासी मुला-मुलींसाठी एलकेजी ते इयत्ता १२ वी पर्यंत मोफत शिक्षण आणि वसतिगृह सुविधा

आरोग्य (रुग्णालय): दुर्गम भागातील आदिवासींना मोफत वैद्यकीय उपचार, सर्पदंश, आणि इतर आजारांवर सेवा

वन्यजीव अनाथालय: जखमी आणि अनाथ हिंस्त्र प्राण्यांची (बिबट्या, अस्वल, इ.) काळजी घेणारे अनोखे केंद्र

हा प्रकल्प आदिवासींसाठी एक दीपस्तंभ ठरला असून, शिक्षणाच्या माध्यमातून नवीन पिढी घडवत आहे