उदगीरमध्ये सम्राट अशोक जयंती उत्साहात साजरी – भव्य रॅलीने शहर दणाणले.  महापुरुषांच्या प्रतिमांचे पूजन; अधिकारी व धम्मदूतांचा मार्गदर्शनपर सहभाग

दैनिक चालु वार्ता उदगीर प्रतिनिधी -अविनाश देवकते

लातूर (उदगीर) : उदगीर शहरात चक्रवर्ती सम्राट अशोक यांची जयंती दिनांक ५ एप्रिल रोजी अत्यंत उत्साही वातावरणात आणि हजारोंच्या सहभागाने साजरी करण्यात आली. या निमित्ताने शहरात भव्य रॅलीचे आयोजन करण्यात आले होते. या रॅलीने एकात्मता, बंधुता आणि बौद्ध धम्माच्या प्रचाराचा संदेश दिला.

रॅलीची सुरुवात डॉ. बाबासाहेब आंबेडकर चौक येथून करण्यात आली. या वेळी उपजिल्हाधिकारी सुशांत शिंदे व गटविकास अधिकारी प्रविण सुरोडकर यांच्या हस्ते सम्राट अशोक व अन्य महामानवांच्या प्रतिमांचे पूजन करण्यात आले.

धम्मदूतांचे मार्गदर्शन

कार्यक्रमाला भंते नागसेने बोधी आणि बोधाचार्य विद्यासागर डोरनाळीकर यांचे विशेष मार्गदर्शन लाभले. त्यांनी आपल्या भाषणातून सम्राट अशोक यांच्या धर्मनिष्ठतेचे, अहिंसेच्या तत्वज्ञानाचे महत्त्व सांगत उपस्थितांना प्रेरणा दिली.

या कार्यक्रमाला बाजार समितीचे माजी सभापती सिध्देश्वर पाटील, खरेदी-विक्री संघाचे भरत चामले, प्रा. शिवाजीराव देवनाळे, बाबासाहेब सुर्यवंशी, जितेंद्र शिंदे, एम. एम. बलांडे, एन. सी. कांबळे आदी मान्यवर उपस्थित होते.

रॅलीचा उत्साही मार्गक्रमण

रॅलीने शहरातील मुख्य रस्त्यांवरून विश्वशांती बुद्ध विहार येथे जाऊन सांगता केली. रॅलीदरम्यान जयभीम, नमो बुद्धाय, सम्राट अशोक अमर राहो असे जयघोष करण्यात येत होते.

सामाजिक संघटनांचा सहभाग

या रॅलीमध्ये भारतीय बौद्ध महासभा, समता सैनिक दल, विविध सामाजिक संघटना, तसेच पप्पू गायकवाड, अविनाश गायकवाड, रामजी पिंपरे, सुनील पकोळे, अमोल सुर्यवंशी, सुनील गोडबोले, सचिन गायकवाड, सग्राम गायकवाड, जनार्दन सुर्यवंशी यांच्यासह शहर व ग्रामीण भागातील असंख्य बौद्ध अनुयायी मोठ्या संख्येने सहभागी झाले होते.

एकतेचा संदेश आणि सामाजिक सलोखा

या रॅलीच्या माध्यमातून सम्राट अशोक यांची बौद्ध धम्माची शिकवण, अहिंसा, सहिष्णुता आणि शांतता यांचा जागर करण्यात आला. समाजातील सर्व स्तरातील नागरिकांनी मोठ्या उत्साहाने सहभाग घेऊन सामाजिक सलोख्याचे दर्शन घडवले.