दै चालु वार्ता 
दोघांचा होरपळून मृत्यू, मध्यरात्री काय घडलं ?
पुण्यातून एक हृदयद्रावक घटना समोर आली आहे. शहराच्या वारजे माळवाडी परिसरातील गोकुळनगर येथे मध्यरात्री एका घरात सिलिंडरचा मोठा स्फोट झाला. या घटनेत दोन जणांचा होरपळून मृत्यू झाल्याची घटना घडली आहे.
या घटनेने परिसरातून हळहळ व्यक्त केली जात आहे. ही घटना मध्यरात्री सुमारे ३ वाजण्याच्या सुमारास पत्र्याच्या बांधकाम असलेल्या घरांमध्ये घडली आहे.
याबाबत मिळालेल्या माहितीनुसार, वारजे माळवाडी भागातील गोकुळ नगरमध्ये असलेल्या काही पत्र्याच्या घरांना मध्यरात्री सुमारे ३ वाजण्याच्या सुमारास अचानक आग लागली. आगीचे कारण समोर आले नसले तरी, प्रत्यक्षदर्शींनी दिलेल्या माहितीनुसार, एका घरात सिलिंडरचा मोठा स्फोट झाला आणि त्यानंतर आगीने रौद्र रूप धारण केले. मध्यरात्रीची वेळ असल्याने अनेकजण गाढ झोपेत होते.
घटनेची माहिती मिळताच अग्निशमन दल आणि वारजे पोलिसांनी तातडीने घटनास्थळी धाव घेतली. अग्निशमन दलाने आग आटोक्यात आणली, मात्र तोपर्यंत दोन व्यक्ती गंभीररीत्या भाजल्या गेल्या होत्या. या दोघांवर उपचार सुरू असताना त्यांचा मृत्यू झाला. या घटनेचे नेमके कारण अद्याप स्पष्ट झालेले नाही. वारजे पोलिसांनी या प्रकरणाचा तपास सुरु केला असून स्फोटामागील कारण आणि अन्य बाबींची चौकशी सुरू आहे. या दुर्घटनेमुळे परिसरात भीतीचे वातावरण पसरले आहे.
दरम्यान, या घटनेमुळे परिसरात शोककळा पसरली आहे. अग्निशमन दल आणि पोलीस घटनास्थळी असून, आगीच्या कारणांचा आणि मृतांची ओळख पटवण्याचा प्रयत्न करत आहेत. प्रशासनाकडून या घटनेची गंभीर दखल घेण्यात आली आहे.
