पत्रकाराच्या वयोवृद्ध आईंचा संशयास्पद मृत्यू..? द युवा ग्रामीण पत्रकार संघाचे पोलीस उप अधीक्षकांना निवेदन.

दैनिक चालू वार्ता प्रतिनिधी – स्वरूप गिरमकर 

( पुणे ) वाघोली : द युवा ग्रामीण पत्रकार संघ पुणे जिल्ह्याच्या वतीने शुक्रवारी उपविभागीय पोलीस अधिकारी यांना पत्रकार निलेश जगताप (रा. शिक्रापूर ) यांच्या आई नंदा जगताप या पाबळ चौकात भाजी विक्रीसाठी गेले असता तेथे एक पोलीस कर्मचारी व एका महिलेने नंदा जगताप यांच्याशी वाद घातल्याने व मानसिक त्रास दिल्याने त्यांना हृदयविकाराचा तीव्र झटका आल्याने त्यांचा संशयास्पद मृत्यू झाल्याचा आरोप निलेश जगताप यांनी केला आहे.याबाबत सखोल चौकशी होऊन न्याय मिळण्याबाबत द युवा ग्रामीण पत्रकार संघटनेचे संस्थापक अध्यक्ष अन्सार शेख यांच्या मार्गदर्शनात पुणे जिल्हा कार्यकारिणी यांच्यातर्फे निवेदन देण्यात आले .

याबाबत एका महिलेशी वाद झाल्याने भोवळ येऊन पडल्याबाबत पोलीस ठाण्यात आकस्मिक मृत्यूची नोंद करण्यात आली आहे. मात्र निलेश जगताप यांनी पत्रकार संघाकडे न्यायाची मागणी करत या बाबत एक पोलीस कर्मचाऱ्यांने व एका खाजगी इमारतीत काम करणाऱ्या कर्मचारी महिलेने दबाव आणल्यानेच हृदयविकाराचा तीव्र झटका येऊन मृत्यू झाल्याचा आरोप केला.

यावेळी द युवा ग्रामीण पत्रकार संघाच्या महिला राज्य सचिव मंगलताई सासवडे,पुणे जिल्हा अध्यक्ष शकील मनियार, पत्रकार निलेश जगताप, शिरूर तालुका अध्यक्ष विजय कांबळे, शिरूर तालुका संपर्कप्रमुख चेतन पडवळ, शिरूर तालुका संघटक संतोष काळे, शिरूर तालुका सल्लागार नितीन मिसाळ, तालुका सदस्य शरद रासकर सर्व पदाधिकारी यांनी निवेदन देत या प्रकरणाची तात्काळ चौकशी करून दोषींवर कडक कारवाई करण्याची मागणी केली.