दै चालु वार्ता 
4 माजी आमदारांचा लवकरच प्रवेश; अजितदादांनाही धक्का !
स्थानिक स्वराज्य संस्थांच्या निवडणुकांच्या पार्श्वभूमीवर सोलापूर शहरातील राजकारणात मोठी राजकीय खळबळ उडाली आहे. गुरुवारी रात्री मुंबईत मुख्यमंत्री देवेंद्र फडणवीस यांच्या वर्षा या शासकीय निवासस्थानी झालेल्या महत्त्वाच्या बैठकीत शहरातील अनेक माजी नगरसेवकांनी भारतीय जनता पक्षात प्रवेश केला आहे.
भाजपचे ऑपरेशन लोटसने सोलापूरच्या राजकीय क्षेत्राला जबर धक्का दिला आहे. उपमुख्यमंत्री अजित पवार यांच्या नेतृत्वाखालील राष्ट्रवादीलाही मोठा धक्का बसणार असून माजी आमदार राजन पाटील, माजी आमदार यशवंत माने, माजी आमदार बबनदादा शिंदे आणि त्यांचे चिरंजीव रणजित शिंदे हे देखील लवकरच मुख्यमंत्र्यांच्या उपस्थितीत भाजप प्रवेश करतील, अशी शक्यता वर्तवली जात आहे. काँग्रेसचे नेते व माजी आमदार दिलीप माने यांचा सुद्धा भाजप प्रवेश जवळपास निश्चित झाला आहे. मुख्यमंत्री देवेंद्र फडणवीस यांनी या माजी आमदारांच्या पक्ष प्रवेशाला ग्रीन सिग्नल दिल्याची माहिती सूत्रांनी दिली आहे.
मिळालेल्या माहितीनुसार, स्थानिक स्वराज्य संस्थांच्या निवडणुकीच्या अगोदर सोलापुरातील स्थानिक नेत्यांनी भाजपमध्ये प्रवेश केला आहे. माजी महापौर दिलीप कोल्हे, पद्माकर नाना काळे, मंदाकिनी तोडकरी, सुभाष डांगे, बिज्जू प्रधाने यांच्यासह अनेकांनी भारतीय जनता पार्टीत प्रवेश केला. या सर्व स्थानिक नेत्यांनी भाजप आमदार देवेंद्र कोठे आणि पालकमंत्री जयकुमार गोरे यांच्या नेतृत्वाखाली भाजपमध्ये प्रवेश केला असून आगामी महापालिका निवडणुकीच्या पार्श्वभूमीवर पक्षात अनेकजण प्रवेश करणार अशी चर्चा सुरू होती. गुरुवारी रात्री या चर्चेला पूर्णविराम मिळाला आहे.
माजी आमदारांच्या पक्ष प्रवेशाची चर्चा
काँग्रेस नेते आणि माजी आमदार दिलीप माने, अजित पवारांच्या राष्ट्रवादीतील माजी आमदार राजन पाटील, माजी आमदार यशवंत माने, माढा तालुक्यातील माजी आमदार पुत्र रणजित शिंदे, माढ्याचे माजी आमदार बबनदादा शिंदे यांचाही भाजप प्रवेश सोहळा लवकरच होणार असल्याची जोरदार चर्चा सुरू आहे. मुख्यमंत्र्यांसोबत झालेल्या बैठकीत माजी आमदार दिलीप माने, राजन पाटील, यशवंत माने, रणजितसिंह शिंदे यांच्याही भाजप प्रवेशबाबात चर्चा झाल्याची माहिती आहे. मुख्यमंत्री फडणवीस यांनीही त्यांना ग्रीन सिग्नल दिल्याची माहिती सूत्रांनी दिली. लवकरच मोठ्या सोहळ्यात त्यांचा प्रवेश होईल, असे समजते. या बैठकीला माजी आमदार दिलीप माने उपस्थित होते.
दरम्यान, गुरूवारी शहरातील स्थानिक नेत्यांचे झालेले सर्व प्रवेश भाजप आमदार देवेंद्र कोठे यांच्या माध्यमातून झाले आहेत. प्रवेश करणारे सर्व नेते हे शहर उत्तर विधानसभा मतदारसंघातील आहेत. त्यामुळे याचे परिणाम आगामी काळात शहर भाजपच्या राजकारणावर होणार आहे. गेल्या अनेक महिन्यांपासून हे नेते भाजपमध्ये जाणार अशी चर्चा सुरूच होती. मात्र प्रवेशाला या ना त्या कारणाने विलंब होत होता. अखेर आ. कोठेंच्या मध्यस्थीने हा प्रवेश सोहळा गुरूवारी रात्री पार पडला.
