“दुःखातून निर्धार, आठवणींतून विकास; दादांच्या स्वप्नातील औंध साकारण्यासाठी राष्ट्रवादीचा औंधमध्ये जनसंवाद”

दैनिक चालू वार्ता वृत्तसेवा औंध प्रतिनिधी- निहाल मणेर 

औंध: काळाच्या पडद्यावर जखमांसारखी उमटलेली दुःखद आठवण मनात ठेवूनही, विकासाची मशाल विझू न देण्याचा संकल्प करत राष्ट्रवादी काँग्रेसने औंधमध्ये पुन्हा एकदा जनतेच्या दारात पाऊल टाकले. घरोघरी भेटी देत जाहिरनाम्याचे वाटप आणि थेट जनसंवादाच्या माध्यमातून औंध गटाच्या उमेदवार मनीषा फडतरे आणि औंध गणाचे उमेदवार शुभम शिंदे यांनी प्रचाराला नव्या अर्थाने सुरुवात केली. अजित दादांच्या जाण्याने काही काळ थंडावलेली प्रचारयंत्रणा ही दुःखातून उभारी घेऊन पुन्हा मार्गस्थ झाली आहे. ही उभारी केवळ राजकीय नव्हे, तर भावनिक आणि मूल्याधिष्ठित आहे. औंधच्या विकासासाठी आणि दादांच्या मनात साकारलेले औंध पुन्हा विकासाच्या रेषेवर आणण्यासाठी राणीसाहेब यांनी उमेदवारांना नवा आत्मविश्वास दिला. “दादांच्या स्वप्नातील औंध आपल्यालाच साकारायचे आहे,” असा ठाम संदेश देत त्यांनी प्रचारात सक्रिय होण्याचे आवाहन केले.

राणीसाहेब म्हणाल्या, “दादांनी निधी उपलब्ध करून दिला, कामांना दिशा दिली; आता ती कामे पूर्णत्वास नेणे ही आपली सामूहिक जबाबदारी आहे. त्यासाठी जनतेची साथ, जनतेचा विश्वास आणि जनतेच्या अडीअडचणी समजून घेणारी संवेदनशील वाटचाल हवी.” या शब्दांत विकासाचा आराखडा तर होता, पण त्याहून अधिक होता तो लोकांशी नातं जपण्याचा सूर. याच भावनेतून मनीषाताई फडतरे यांनी स्पष्ट केले की, “राणीसाहेबांच्या आदेशानुसार आम्ही ही वाटचाल निर्धाराने पुढे नेऊ. लोकांच्या प्रश्नांना ऐकून, त्यांच्या दैनंदिन अडचणींना हात घालूनच विकासाचा मार्ग रुंदावणार आहोत.” शुभम शिंदे यांनीही युवकांशी संवाद साधत, रोजगार, पायाभूत सुविधा आणि ग्रामविकासाच्या मुद्द्यांवर ठोस भूमिका मांडली.

औंधच्या गल्लीबोळांतून फिरताना हा प्रचार कुठेही आक्रमक नव्हता; तो होता ऐकणारा, समजून घेणारा आणि विश्वास पुन्हा उभा करणारा. जाहिरनाम्याच्या पानांत आकडे होते, पण जनसंवादात माणुसकी होती. दादांच्या आठवणींना नमन करत, त्यांच्या स्वप्नांना दिशा देणारी ही शांत पण ठाम वाटचाल औंधच्या राजकारणाला नवा आशय देत आहे विकासाचा, विश्वासाचा आणि संवेदनशील नेतृत्वाचा.