विजाभज कल्याण समितीकडून विविध विषयांचा आढावा

दैनिक चालु वार्ता अमरावती प्रतिनिधी- श्रीकांत नाथे

अमरावती :-शासनाची विविध कार्यालये,स्थानिक स्वराज्य संस्था यांच्या आस्थापनेवरील विमुक्त जाती व भटक्या जमातीचे अधिकारी व कर्मचारी भरती,बढती,आरक्षण व अनुशेष,तसेच विविध कल्याणकारी योजनांचा आढावा महाराष्ट्र विधानमंडळ विमुक्त जाती व भटक्या जमाती कल्याण समितीने नियोजन भवनात घेतला.

समितीने गत दोन दिवस जिल्ह्यात विविध ठिकाणी दौरा करून शाळा- वसतिगृहे,विकासकामे यांची तपासणी केली तसेच स्थानिक बांधवांशी चर्चा करून त्यांच्या अडचणी जाणून घेतल्या.त्या अनुषंगाने व विविध आस्थापनांवरील विजाभज प्रवर्गातील अधिकारी- कर्मचारी भरती,बढती,अनुशेष आदींबाबत चर्चा करण्यासाठी नियोजनभवनात बैठक आयोजित करण्यात आली.

समितीप्रमुख आमदार शांताराम मोरे हे आढावा बैठकीच्या अध्यक्षस्थानी होते.समितीचे सदस्य सर्वश्री बळवंतराव वानखडे,सुरेश भोळे,संजय दौंड,राजेश राठोड,अवर सचिव मंगेश मिसाळ,कक्षाधिकारी विनोद राठोड,जिल्हा पोलीस अधिक्षक अविनाश बारगळ,महापालिका आयुक्त प्रवीण आष्टीकर,निवासी उपजिल्हाधिकारी आशिष बिजवल यांच्यासह जिल्हा परिषद व विविध विभागप्रमुख उपस्थित होते.

महापालिका,नगरपालिका,नगरपंचायती,परिवहन,एमआयडीसी, पोलीस,उद्योग विभाग,सार्वजनिक बांधकाम,जिल्हाधिकारी कार्यालय,जिल्हा परिषद कार्यालय,समाजकल्याण आदी कार्यालयांच्या आस्थापनेवरील अधिकारी व कर्मचारी यांची भरती,बढती,आरक्षण व अनुशेष आदींबाबत आढावा समितीने घेतला.

विमुक्त जाती व भटक्या जमातीच्या समाजबांधवांना रोजगारनिर्मिती कार्यक्रम,बीजभांडवल योजना,यशवंतराव चव्हाण मुक्त वसाहत योजना,दुधाळ जनावरांचे वाटप,गायगोठे योजना यासह विविध योजनांचा लाभ मिळण्यासाठी प्रभावी अंमलबजावणी करावी.अमरावतीत बहुरूपी समाजाला कला सादर करण्यासाठी कलाभवन उभारण्याची समाजबांधवांची मागणी आहे.त्यासाठी महापालिकेने पुढाकार घ्यावा असे निर्देश समितीने दिले.