कोरोनामध्ये पालक गमविलेल्या विद्यार्थ्यांना मिळणार शुल्कमाफी, पुणे विद्यापीठाचे निर्देश

दैनिक चालु वार्ता पुणे प्रतिनिधी -शाम पुणेकर.

पुणे : करोना काळात पालक गमावलेल्या विद्यार्थ्यांचे शुल्क माफ करण्याचे निर्देश सावित्रीबाई फुले पुणे विद्यापीठाने संलग्न महाविद्यालयांना परिपत्रकाद्वारे दिले. विद्यापीठाने शुल्कमाफी संदर्भातील परिपत्रक प्रसिद्ध करूनही महाविद्यालयांनी शुल्कमाफीची अंमलबजावणी केली नसल्याच्या तक्रारी विद्यार्थी, पालक आणि विद्यार्थी संघटनांकडून करण्यात आल्याने विद्यापीठाकडून पुन्हा नव्याने परिपत्रकाद्वारे सूचना देण्यात आल्या.

अशा विद्यार्थ्यांच्या आर्थिक अडचणी लक्षात घेऊन उच्च व तंत्रशिक्षण विभागाने करोनामुळे पालक गमावलेल्या विद्यार्थ्यांचे संपूर्ण शुल्क माफ करण्याचा निर्णय घेतला होता. विद्यापीठाने परिपत्रक प्रसिद्ध करून अंमलबजावणीचे निर्देश दिले होते. मात्र महाविद्यालयांकडून शुल्कमाफी करण्यात न आल्याने विद्यार्थी संघटनांकडून पाठपुरावा करण्यात येत होता.  विद्यापीठाने प्रसिद्ध केलेल्या परिपत्रकानुसार करोनामुळे पालक गमावलेल्या विद्यार्थ्यांना शुल्कमाफी त्वरित द्यावी असे कडक निर्देशित करण्यात आले.