अमरावती जिल्हा दक्षता व नियंत्रण समितीचा आढावा.

दैनिक चालु वार्ता अमरावती प्रतिनिधी-श्रीकांत नाथे

अमरावती :- जिल्ह्यातील अनुसूचित जाती,जमाती अत्याचार प्रतिबंधक अधिनियमानुसार घडलेला गुन्हा आणि त्यावर करण्यात आलेल्या कार्यवाहीचा आज दि.२३ ऑगस्ट २०२२ रोजी आढावा घेण्यात आला.निवासी उपजिल्हाधिकारी आशिष बिजवल यांनी जिल्हा दक्षता व नियंत्रण समितीची बैठक घेऊन आढावा घेतला.जिल्हाधिकारी कार्यालयात ही बैठक घेण्यात आली होती.
जिल्हा दक्षता व सनियंत्रण समितीमध्ये जिल्ह्यातील ग्रामीण तसेच शहरी भागातील अजाअजप्रका कायद्यातंर्गत जुलै महिन्यात झालेल्या गुन्ह्यासंबंधात आढावा घेण्यात आला.त्यामध्ये जुलै महिन्यात शहरी विभागात एकूण ६ तर ग्रामीण भागात एकूण 8 अशा एकूण १४ गुन्ह्यांची नोंद झाल्याची माहिती यावेळी देण्यात आली.
पोलीस तपासावर असलेले गुन्हे,हायकोर्ट स्थगिती गुन्हे,अपिल प्रलंबित गुन्हे,अर्थसहाय्यासाठी प्रलंबित गुन्हे याबाबत आढावा घेण्यात आला.अर्थसहाय्यासाठी प्रलंबित प्रकरणात निधी प्राप्त होताच,तात्काळ अर्थसहाय वाटप करण्यासाठी निर्देश देण्यात आले.बैठकीमध्ये समाज कल्याण सहायक आयुक्त माया केदार,पोलीस निरीक्षक अर्जून ठोसरे,उपपोलीस अधीक्षक प्रदीप सूर्यवंशी,पोलीस निरीक्षक प्रमोद पाचकवडे,ॲड.अनुप्रिती ढवळे,शासकीय अभियोक्ता राजेंद्र महल्ले,अशासकीय सदस्य दिलीप काळबांडे,समाज कल्याण निरीक्षक,एस.आर.कोंडे आदी उपस्थित होते.