पुण्यात दुचाकी चोरट्यांकडून १८ गुन्हे उघड; तिघांना केली अटक

दैनिक चालु वार्ता उपसंपादक पुणे जिल्हा -शाम पुणेकर.

पुणे : शहराच्या वेगवेगळ्या भागातून दुचाकी लांबविणाऱ्या चोरट्यांना वारजे पोलिसांनी पकडले. चोरट्यांकडून दुचाकी चोरीचे १८ गुन्हे उघडकीस आले असून पाच दुचाकी जप्त करण्यात आल्या आहेत. सागर अशोक चव्हाण वय २७, रा. व्यंकटेश लेक लाईफ सोसायटी, दत्तनगर, कात्रज, संदीप संपत आंधळे वय २१, रा. गुजरवाडी, कात्रज, आकाश वसंत लोखंडे वय २२, रा. वारजे माळवाडी अशी अटक करण्यात आलेल्यांची नावे आहेत. कर्वेनगर भागातून काही दिवसांपूर्वी दुचाकी चोरीला गेली होती.

या गुन्ह्याचा पोलिसांकडून तपास करण्यात येत होता. चोरलेली दुचाकी आरोपींनी एका गॅरेजमध्ये ठेवली होती.याबाबतची माहिती पोलिसांना मिळाली. त्यानंतर पोलिसांच्या पथकाने सापळा लावून चव्हाण, आंधळेला पकडले. चौकशीत साथीदार आकाश लोखंडेचे नाव निष्पन्न झाले. चोरट्यांकडून पाच दुचाकी जप्त करण्यात आल्या.

 वारजे, एरंडवणे, सिंहगड रस्ता, हडपसर, वाकड, चतु:शृंगी, हिंजवडी, पिंपरी भागातून चोरट्यांनी दुचाकी लांबविल्याचे उघड झाले आहे. पुढील तपास पोलीस करीत आहेत.