आरोग्य कर्मचाऱ्यांच्या जीवाशी खेळणे बंद करा ; सुरक्षा साधनांविना कचरा संकलन.

दैनिक चालू वार्ता प्रतिनिधी – स्वरूप गिरमकर

पुणे महापालिकेने वाघोलीत पावसाळापूर्व कामे सुरू केली आहे. नालेसफाईचे काम तसेच कचरा संकलनाचे काम मोठ्याप्रमाणावर यांत्रिकी पद्धतीऐवजी कामगारांचा जीव धोक्यात घालून केले जात आहे. श्रीमंत आणि स्मार्ट महापालिका म्हणून बिरुद मिळविणारी महापालिका आरोग्य कर्मचाऱ्यांना सुरक्षा साधणे पुरवित नसल्याचा आक्षेप कामगारांनीच नोंदविला आहे.’ही कसली स्मार्ट सिटी, आरोग्य कर्मचाऱ्यांच्या जीवाशी खेळणे बंद करा, अशी मागणी कामगार करीत आहेत. पुणे महापालिकेच्या आरोग्यविभागात कायम तत्वावरील कामगार, घंटागाडी कामगार आणि ठेकेदारांकडील कामगार असे मनुष्यबळ आहे.दैनंदिन साफसफाई, रस्ते स्वच्छता, किटकनाशक फवारणी, नाले सफाई, कचरा संकलन आणि वाहतूक, सार्वजनिक शौचालयांची स्वच्छता आदी कामे महापालिकेच्या आरोग्य विभागातर्फे केली जातात. तसेच शहर स्वच्छते कामी महापालिकेने क्षेत्रीय कार्यालयानिहाय कामगार नियुक्त केले जात आहेत. त्यात सहायक आरोग्य अधिकारी, मुख्य आरोग्य निरीक्षक, आरोग्य निरीक्षक, मलेरिया निरीक्षक, वाहन चालक, आरोग्य सहायक, मुकादम, गटरकुली, सफाई कामगार, सफाई सेवक, कचराकुली, मजुर, शिपाई, मेंटेनंस हेल्पर सेवेतील कामगारांचा समावेश आहे.

कामगारांच्या मागणीकडे दुर्लक्ष

दरवर्षी पावसाळा सुरु होण्यापुर्वी नालेसफाईची कामे हाती घेण्याचा सोपस्कार पुर्ण केला जातो. आरोग्य कर्मचाऱ्यांना गमबूट, मास्क, हातमोजे, अवजारे पुरविणे बंधनकारक आहे. मात्र, नाला – गटारे कचरा संकलन आणि मलनि:सारण वाहिन्यांची स्वच्छता करताना आवश्यक हातमोजे, गम बूट आणि इतर साहित्य देखील वेळेत मिळत नसल्याची वस्तुस्थिती आहे.

या कायद्याकडे होतेय दुर्लक्ष

आरोग्य क्षेत्रात कार्यरत प्रत्येक कर्मचाºयाला मुलभूत सुविधा पुरवाव्यात, अशी कायदेशीर तरतूद ‘हाताने मैला साफ कार्य करण्यास प्रतिबंध आणि सफाई कामगारांचे पुनर्वसन अधिनियम २०१३’ मध्ये आहे. मात्र ,पुणे महापालिका या कायद्याचे उल्लंघन करीत आहे.

वाघोलीत सफाई कर्मचाऱ्यांच्या आरोग्याबाबत महापालिका सजग नसल्याचे चित्र आहे. यंदाही नालेसफाई व जागोजागीचा कचरा साफ करताना ठिकठिकाणी सफाई कर्मचारी जीव धोक्यात घालून काम करत असल्याचे विदारक चित्र आहे. सुरक्षासाधनांविना होत असलेल्या साफसफाई प्रकरणी महानगरपालिकेने ताबडतोब पाऊले उचलण्याची गरज आहे.

– प्रकाशभाऊ जमधडे

– सामाजिक कार्यकर्ते वाघोली.