“न समजलेले आई-बाबा” – हृदय पिळवटून टाकणारे व्याख्यान!    पालकांचा त्याग विसरणाऱ्या पिढीला वसंत हंकारे यांचा जोरदार कानपिचका!

दैनिक चालु वार्ता उदगीर प्रतिनिधी-अविनाश देवकते

लातूर (उदगीर) :विद्यावर्धिनी हायस्कूल, उदगीर येथे श्री राम प्रतिष्ठान ट्रस्टच्या वतीने २३ मार्च रविवार रोजी श्रीराम नवमी महोत्सव अंतर्गत सुप्रसिद्ध व्याख्याते श्री वसंतजी हंकारे यांचे “न समजलेले आई-बाबा” या विषयावर जबरदस्त, विचारांना जाग आणणारे आणि हृदय पिळवटून टाकणारे व्याख्यान झाले.

आई-वडील फक्त जबाबदारी नाहीत, तेच खरे देव!

हंकारे यांनी आपल्या खणखणीत आवाजात स्पष्ट केले की “आई-वडील केवळ कर्तव्य म्हणून सांभाळायचे नसतात, तर ते आपल्या जीवनाचा आधारस्तंभ असतात!” आजच्या पिढीने त्यांच्या त्यागाची किंमत ओळखायला हवी, अन्यथा भविष्यात कुटुंबसंस्था उध्वस्त होण्याची वेळ येईल, असा गंभीर इशारा त्यांनी दिला.

संस्कार विसरणाऱ्या तरुणांना खडसावणारा प्रश्न!

आजची तरुण पिढी करिअर, मोबाईल आणि सोशल मीडियाच्या आहारी जाऊन पालकांना गृहित धरतेय. पालकांना बोलण्यासाठी वेळ नाही, त्यांच्या भावना समजून घेण्यासाठी इच्छाशक्ती नाही—यावर त्यांनी कठोर शब्दांत आवाज उठवला. “मोठे होता होता माणूस होणार आहात का?” असा थेट सवाल करत त्यांनी श्रोत्यांना अंतर्मुख केले.

आई-बाबांचा सन्मान कराल, तरच तुमची मुले उद्या तुम्हाला सन्मान देतील!

संस्कार ही भारतीय संस्कृतीची शान आहे. “मुलांना शिक्षण द्याल, पैसा द्याल, पण संस्कार देताय का?” हा प्रश्न उपस्थित करत हंकारे यांनी पालकांनाही जबाबदारीची जाणीव करून दिली. “ज्यांनी लहानाचे मोठे केले, त्यांनाच वृद्धाश्रमात पाठवणार का?” या प्रश्नाने उपस्थितांना अक्षरशः हादरवून टाकले.

भावनांचा बांध फुटला, टाळ्यांचा कडकडाट!

व्याख्यानाच्या शेवटी संपूर्ण मैदान भारावून गेले. अनेकांच्या डोळ्यांत अश्रू होते. “आई-बाबांसाठी वेळ काढा, त्यांच्याशी बोला, त्यांना समजून घ्या” हा मंत्र देत हंकारे यांनी आपल्या भाषणाचा समारोप केला. टाळ्यांच्या कडकडाटात त्यांचा सत्कार करण्यात आला.

________________________________

हे व्याख्यान म्हणजे केवळ शब्द नव्हते, तर पालक-मुलांच्या नात्याचा आरसा होता!

________________________________