लातूर जिल्ह्यात औषध विक्रीचा गंभीर प्रश्न : फार्मासिस्टशिवाय मेडिकल दुकाने सुरु – कायदा पायदळी तुडवला जातोय!

दैनिक चालु वार्ता उदगीर प्रतिनिधी-अविनाश देवकते

लातूर (उदगीर) : लातूर जिल्ह्यात आरोग्याच्या दृष्टीने अतिशय गंभीर बाब उघडकीस आली आहे. मेडिकल व्यवसायासारख्या संवेदनशील क्षेत्रात कायद्याचे उल्लंघन सर्रासपणे सुरू असून अनेक दुकानदार फार्मासिस्टशिवाय औषधे विकत आहेत. यामुळे रुग्णांच्या जीवाशी खेळला जात आहे. या प्रकाराला चाप बसावा यासाठी ‘लातूर जिल्हा रिटेल केमिस्ट अँड ड्रगिस्ट असोसिएशन’ने जोरदार पाठपुरावा सुरू केला आहे.

असोसिएशनचे जिल्हाध्यक्ष रामबिलास नावंदर यांनी सहायक आयुक्त, अन्न व औषध प्रशासन, लातूर यांच्याकडे तक्रार सादर करत याबाबत ठोस आणि तात्काळ कारवाईची मागणी केली आहे. त्यांनी सादर केलेल्या निवेदनात उल्लेख केला आहे की, जिल्ह्यातील खाजगी हॉस्पिटल्स, डॉक्टरांचे क्लिनिक, आणि काही नामांकित मेडिकल स्टोअर्स देखील कोणत्याही योग्यतेच्या व्यक्तीविना चालवले जात आहेत. औषध विक्रीसाठी कायद्यानुसार नोंदणीकृत आणि उपस्थित फार्मासिस्ट असणे आवश्यक आहे. मात्र अनेक ठिकाणी ही अट धाब्यावर बसवली गेली आहे.

धोकादायक प्रकार वाढतोय :

या अनधिकृत दुकानांमध्ये काम करणाऱ्या व्यक्तींना औषधांचा साधा अभ्यास नसतो, त्यामुळे अनेक वेळा चुकीचे औषध दिले जाते. त्यामुळे रुग्णाच्या प्रकृतीवर उलट परिणाम होण्याचा धोका निर्माण होतो. काही रुग्णांना चुकीचे औषध दिल्यामुळे गंभीर दुष्परिणाम झाल्याची उदाहरणेही पुढे आली आहेत.

रुग्णालयांच्या परिसरातील बेकायदेशीर विक्री केंद्रे :

खाजगी हॉस्पिटल्सच्या आवारात किंवा अगदी डॉक्टरांच्या क्लिनिकमध्येच औषध विक्री केंद्रे सुरू असून, ती ना रजिस्टर आहेत ना त्यांना आवश्यक ती परवाने मिळाले आहेत. यामुळे कायद्याचे सर्रास उल्लंघन होत असून, यामध्ये काही डॉक्टरांचेही प्रत्यक्ष किंवा अप्रत्यक्ष सहभाग असल्याचे निदर्शनास आले आहे.

सरकारी यंत्रणा गप्प का?

या बाबत याआधीही दि. २६ जून २०२३ रोजी निवेदन सादर करण्यात आले होते. पण अद्याप यावर ठोस कारवाई झालेली नाही. त्यामुळे संबंधित अधिकाऱ्यांची भूमिकाच संशयाच्या भोवऱ्यात सापडली आहे. कायद्याची जबाबदारी असणारे अधिकारी जर दुर्लक्ष करत असतील तर हा भ्रष्टाचाराला खतपाणी घालण्यासारखाच प्रकार ठरेल.

असोसिएशनच्या प्रमुख मागण्या :

1. प्रत्येक मेडिकल स्टोअरमध्ये नोंदणीकृत फार्मासिस्टची सक्ती करावी.

2. होलसेल विक्री करणाऱ्या डॉक्टरांकडून औषध विक्री बंद करावी व त्यांच्यावर कडक कारवाई करावी.

3. २४ तास चालणाऱ्या दुकानांना पूर्वपरवानगीशिवाय व्यवसाय करता येऊ नये.

4. अवैध दुकानांची परवाने तत्काळ रद्द करून पोलिस कारवाई करावी.

शासन आणि अन्न व औषध प्रशासन यांची जबाबदारी :

या गंभीर प्रश्नावर जर लवकरात लवकर कारवाई झाली नाही तर जिल्ह्यात मोठ्या प्रमाणावर औषध विक्रीचा अराजक माजेल आणि रुग्णांचे प्राण धोक्यात येतील. त्यामुळे नागरिकांनीही अशा दुकानदारांकडून औषधे खरेदी करताना काळजी घ्यावी. संबंधित दुकानामध्ये फार्मासिस्ट उपलब्ध आहे की नाही, हे तपासूनच औषध खरेदी करावे.

त्वरित उपाययोजना न झाल्यास जनआंदोलनाचा इशारा

लातूर जिल्ह्यातील सर्व रिटेल केमिस्ट व औषध विक्रेते यासाठी एकवटले असून जर प्रशासनाने यावर कारवाई केली नाही तर संघटनेमार्फत जिल्हाभर तीव्र आंदोलन छेडण्यात येईल, असा इशारा नावंदर यांनी दिला आहे. यामुळे आता अन्न व औषध प्रशासन कोणते पाऊल उचलते हे पाहणे महत्त्वाचे ठरणार आहे.

—

संपर्कात राहा, सजग व्हा आणि अवैध औषध विक्रेत्यांपासून सावध रहा!