पोदार इंटरनॅशनल स्कूल, इगतपुरीमध्ये स्वातंत्र्यदिन व इन्व्हेस्टिचर सेरेमनी उत्साहात साजरी

दैनिक चालु वार्ता इगतपुरी प्रतिनिधी :- श्री.विकास पुणेकर

इगतपुरी :- १५ ऑगस्ट २०२५ रोजी, पोदार इंटरनॅशनल स्कूल, इगतपुरीच्या प्रांगणात देशभक्तीचा माहोल निर्माण झाला होता. विद्यार्थी, पालक आणि शिक्षकांनी एकत्र येऊन ७९ वा स्वातंत्र्य दिन मोठ्या उत्साहात साजरा केला. शाळेचे संपूर्ण परिसर तिरंग्याच्या रंगांनी सजले होते आणि सर्वत्र देशप्रेमाचे वातावरण होते.

कार्यक्रमाची सुरुवात पोदार एज्युकेशन नेटवर्क, नाशिक हबचे जनरल मॅनेजर श्री. समीर वाघळे सर यांच्या हस्ते ध्वजारोहणाने झाली. ध्वजाला मानवंदना देत राष्ट्रगीत गाताना सर्वांच्या चेहऱ्यावर अभिमान आणि आनंद झळकत होता.

यानंतर, इगतपुरीचे पोलीस अधिकारी श्री. शैलेश पाटील सर यांनी सर्व विद्यार्थी आणि पालकांना अमली पदार्थ विरोधी शपथ दिली. त्यांनी समाजामध्ये व्यसनमुक्तीचा संदेश देत, विद्यार्थ्यांमध्ये जबाबदारीची जाणीव निर्माण केली.

*सांस्कृतिक कार्यक्रमांनी देशभक्तीला दिली नवी दिशा*

विद्यार्थ्यांनी सादर केलेले प्रेरणादायी भाषण, देशभक्तिपर गीते आणि विविध कार्यक्रमांनी “एक भारत, श्रेष्ठ भारत” या संकल्पनेला साजेसे वातावरण तयार केले.

“द डिजिटल वॉरियर्स” या नाटकाद्वारे विद्यार्थ्यांनी डिजिटल युगात देशभक्ती कशी जपावी, हे प्रभावीपणे दाखवले. कार्यक्रमातील एक खास आकर्षण म्हणजे इयत्ता १ व २ च्या विद्यार्थ्यांची “स्वातंत्र्य मिरवणूक”, ज्यामध्ये लहान मुलांनी महात्मा गांधी, राणी लक्ष्मीबाई, सुभाषचंद्र बोस यांसारख्या थोर स्वातंत्र्यसैनिकांची वेशभूषा केली होती. त्यांच्या सादरीकरणाने उपस्थितांचे मन जिंकले.

यानंतर, विद्यार्थ्यांनी सादर केलेल्या देशभक्तिपर नृत्यांनी संपूर्ण वातावरणात जोश निर्माण केला आणि प्रेक्षकदेखील आनंदाने नाचू लागले.

*इन्व्हेस्टिचर सेरेमनीद्वारे भावी नेतृत्वाचा गौरव*

यानंतर पार पडली इन्व्हेस्टिचर सेरेमनी, ज्यामध्ये नव्याने निवडण्यात आलेल्या विद्यार्थी परिषद सदस्यांना पद आणि जबाबदाऱ्या देण्यात आल्या. श्री. समीर वाघळे सर आणि प्राचार्य श्री. संदेश खताळ सर यांच्या हस्ते विद्यार्थ्यांना बॅजेस आणि सॅशेस प्रदान करण्यात आले. नव्या नेतृत्वाने जबाबदारीने काम करण्याची शपथ घेतली. यानंतर, प्राचार्य श्री. संदेश खताळ सर यांनी विद्यार्थ्यांना स्वातंत्र्य दिनाचे महत्त्व, आणि नेतृत्वाच्या भूमिका समजावून सांगितल्या. त्यांनी विद्यार्थ्यांना प्रेरणा देत देशासाठी योगदान देण्याचे आवाहन केले.

कार्यक्रमाच्या शेवटी प्राचार्य, प्रशासन, शिक्षकवर्ग आणि विद्यार्थ्यांचे विशेष आभार मानण्यात आले, ज्यांच्या अथक परिश्रमांमुळे हा कार्यक्रम संस्मरणीय आणि यशस्वी ठरला.