आमदार उदय सामंत यांची बायको ‘वादळवाट’मधली मुख्य कलाकार, राजकारणाविषयी स्पष्टच म्हणाली..?

वादळवाट’, ‘असंभव’ , ‘राजा शिवछत्रपती’ या मराठी मालिका आजही प्रेक्षकांच्या स्मरणात आहेत. या मालिकांमुळे अभिनेत्री नीलम शिर्केने प्रेक्षकांच्या मनात आपलं एक वेगळं स्थान निर्माण केलं.

‘असंभव’ मालिकेचा विषय निघाला ही डोळ्यासमोर सुलेखा हे पात्रं येतं. ‘असंभव’ मालिकेत नीलम शिर्केने सुलेखाचं पात्र साकारलं होतं. काही सिनेमातही तिने महत्त्वाच्या भूमिका साकारल्या होत्या. मात्र गेल्या काही वर्षांपासून नीलम मनोरंजनसृष्टीपासून दूर आहे.

नीलमने आमदार उदय सामंत यांच्यासोबत लग्न केलं. त्यानंतर सगळा वेळ त्यांनी आपल्या संसारासाठी दिला. नुकतीच नीलमने लोकमत फिल्मीला मुलाखत दिली आहे. या मुलाखतीत नीलमने अनेक विषयांवर भाष्य केलं आहे. राजकारणाविषयी ती काय म्हणाली, ते जाणून घेऊयात.

नीलम उदय सामंत यांच्याबद्दल म्हणाली की, “उदय राजकारणाच्या क्षेत्रात सक्रिय आहे. पण तो एक माणूस म्हणून इतरांपेक्षा खूप वेगळा आहे. त्याला प्रत्येक क्षेत्राबद्दल जाणून घेण्यात रस आहे. तो सध्या शिवसेनेत असला तरी त्याची सगळ्यांसोबत चांगली मैत्री आहे. तो कोणाशीही कधीही खोटी मैत्री करत नाही. ही गोष्ट सगळे जण मान्य करतील. ही त्याच्यासाठी एक मोठी जमेची बाजू आहे.”

नीलमने सांगितलं की, “बायको म्हणून मी कायम त्याला पूर्ण मदत करते. आम्ही एकमेकांना कायम आधार देत असतो. पण आम्ही एकत्र एका व्यासपीठावर कधीच आलेलो नाही. कारण मला राजकारणात रस नाही. मी त्याला बॅकस्टेजला मदत करत असते. प्रचार, मेळावा किंवा इतर कोणताही कार्यक्रम असेल अथवा एखादा निर्णय घ्यायचा असेल तर आम्ही चर्चा करतो. तो माझ्या मतांचा नेहमी आदर करतो. माझ्या सल्ल्यावर विचार करुन मग निर्णय घेतो. नवरा – बायको एकमेकांच्या मतांचा आदर करणारे असतील तर नातं घट्ट होत जातं. माझं काही चुकत असेल तर ते मला सांगतात. एक कॉमन मॅन काय विचार करेल, या दृष्टीकोनातून मी त्याला सल्ला देत असते.”

ती पुढे म्हणाली की, अर्धांगिनी म्हणून मी त्याला प्रचारात शंभर टक्के मदत केली. पण मदत केली हे दाखवून देण्याचा प्रयत्न मी करत नाही. उदय खूप अभ्यासू आहे. तो खूप हुशार आहे. प्रत्येक गोष्ट तो विचारपूर्वक हाताळत असतो. काही प्रश्न सोडवताना मी आतताईपणाने निर्णय घेते. त्यामुळे मी त्याच्या क्षेत्रात जास्त जात नाही. पण आमच्यात चर्चा होते. त्याची कोणती सभा किंवा कार्यक्रम असल्यावर जेवण, पाणी आणि इतर व्यवस्थापनाकडे माझं लक्ष असतं. एक बॅकस्टेज गृहिणी म्हणून मी काही गोष्टी हँडल करत असते. पण पॉलिटिकल स्टेज कधीच शेअर करत नाही.