दै चालु वार्ता 
उद्धव ठाकरे आंदोलकाच्या भेटील…
दै.चालु वार्ता
अंबड प्रतिनिधी ज्ञानेश्वर साळुंके
अंबड : तालुक्यातील अतंरवाली सराटी येथे काल रोजी झालेल्या लाठीचार्ज तसेच गोळीबाराचे राज्यभरात पडसाद उमटले आहेत. शिवसेना (उद्धव बाळासाहेब ठाकरे गट) प्रमुख तथा राज्याचे माजी मुख्यमंत्री उद्धव ठाकरे यांनी आज आंदोलनाच्या ठिकाणी जाऊन आंदोलक मनोज जरांगे यांच्यासोबत पोलिसांकडून झालेल्या लाठीचार्ज तसेच गोळीबाराबद्दल गोळीचे काडतूस हातात घेऊन चर्चा केली. यावेळी त्यांनी झालेल्या प्रकाराबद्दल शासनाच्या विरोधात ताशेरे ओढले आणी गृहमंत्री देवेंद्र फडणवीस यांनी राजीनामा द्यावा अशी मागणी उद्धव ठाकरे यांनी केली.
यावेळी माजी मुख्यमंत्री अशोक चव्हाण, विरोधी पक्षनेते अंबादास दानवे, माजी मंत्री आ. राजेश टोपे, खा. सजंय राऊत, खा. बंडू जाधव, माजी खा. चंद्रकांत खैरे यांची उपस्थिती होती.
उद्धव ठाकरे म्हणाले, मराठा आरक्षणाची मागणी आजची नाही. तेव्हाही लढा सुरु होता, पण लाठीचार्ज आणी गोळीबार झाला नाही. तुम्ही या आंदोलनकर्त्यांना दोनवेळा ‘वर्षा’वर बोलावलं. लवकरच आरक्षणाबाबत समिती गठन करून आरक्षण देऊ असे ‘मिंधे’ बोलले होते. मग त्यांनी दिलेल्या आश्वासनामुळेच मराठा आंदोलक आरक्षणाची मागणी करत आहेत. त्यांची काय चुक होती? त्यांची मागणी रास्त होती. मग त्यांच्यावर लाठीचार्ज आणी गोळीबाराचे आदेश दिले कोणी? असा सवाल उद्धव ठाकरे यांनी उपस्थित केला.
मविआ सरकारात असे भ्याड हल्ले झाले नाहीत
ठाकरे पुढे म्हणाले, माझ्या मराठा समाजबांधवाच्या ज्या मागण्या आहेत त्या तुम्ही मान्य करा. त्यांना न्याय मिळाला पाहिजे. हे सरकार निर्घृण आहे. त्यांच्यात माणुसकी उरली नाही. हे हिंदूंच्या सणाला आडवं येणार सरकार आहे. मविआ सरकारच्या काळातही आंदोलने झाली. मात्र असे भ्याड हल्ले कधीही झाले नाहीत. मराठा समाजाच्या मागण्यांचा आदर करा असे ठाकरे यांनी राज्य सरकारनला आवाहन केले.
ही याच मातीतील माणसं, त्यांना न्याय मिळालाच पाहिजे
अंबड तालुक्यात आंदोलन करणारी मंडळी चीन, पाकिस्तानातुन आलेली नाहीत. ही या मातीतील माणसं आहेत. त्यांना त्यांचा हक्क द्यावाच लागेल. शांतताप्रिय आंदोलन सुरु असतांना असा भ्याड हल्ला होतीच कसा? याची सखोल चौकशी व्हायलाच पाहिजे. पोलिसांना हे आदेश कोणी दिले याची चौकशी व्हायलाच पाहिजे. जे गुन्हे दाखल झाले आहेत ते मागे घेतले पाहिजेत आणी पुन्हा गुन्हे दाखल होता कामा नयेत असे ठाकरे यांनी ठणकावून सांगितले.
