ग्राहक हक्क दिनाच्या नावाखाली अधिकाऱ्यांचा भ्रष्टाचाराचा खेळ!”  “फक्त कागदोपत्री जागरूकता – भ्रष्टाचाराची नवी शक्कल!”

दैनिक चालु वार्ता उदगीर प्रतिनिधी -अविनाश देवकते

लातूर (उदगीर) :जागतिक ग्राहक हक्क दिन (१५ मार्च) निमित्ताने जिल्ह्यात विविध ठिकाणी कार्यक्रमांचे आयोजन अपेक्षित होते. मात्र, अनेक शासकीय अधिकाऱ्यांनी या महत्त्वाच्या कार्यक्रमाला अनुपस्थित राहून दुर्लक्ष केल्याने ग्राहक पंचायत महाराष्ट्र राज्याच्या पदाधिकाऱ्यांनी त्याचा तीव्र निषेध व्यक्त केला आहे.

ग्राहक पंचायत महाराष्ट्र राज्याचे विभागीय अध्यक्ष सतीश माने मदनसुरीकर, विभागीय संघटक प्रा. हेमंत वडणे, जिल्हा संघटक बी. जी. शिंदे अतनूरकर व अन्य पदाधिकाऱ्यांनी जिल्हाधिकारी, जिल्हा पुरवठा अधिकारी, उपविभागीय अधिकारी, तहसीलदार, नायब तहसीलदार आणि पुरवठा विभागातील जबाबदार अधिकाऱ्यांनी या कार्यक्रमात भाग न घेतल्याबद्दल प्रशासनाच्या भूमिकेवर प्रश्नचिन्ह उपस्थित केले आहे.

फोटोसेशनपुरता कार्यक्रम – निधीचा अपव्यय?

ग्राहक पंचायत पदाधिकाऱ्यांच्या म्हणण्यानुसार, राज्य आणि केंद्र सरकारकडून ग्राहक जनजागृतीसाठी मोठ्या प्रमाणात निधी मंजूर केला जातो. परंतु हा निधी केवळ कागदोपत्री दाखवला जातो आणि प्रत्यक्षात कोणत्याही ठोस उपक्रमावर खर्च केला जात नाही. यामुळे ग्राहकांसाठी महत्त्वाचा असलेला हा दिन केवळ बॅनर लावून आणि फोटोसेशन करून साजरा केला जातो, असा आरोप त्यांनी केला आहे.

ग्राहक संरक्षण परिषदेचे शासननियुक्त सदस्य बालासाहेब गोविंदराव शिंदे यांनी सांगितले की, “१५ मार्च हा जागतिक ग्राहक हक्क दिन आणि २४ डिसेंबर हा राष्ट्रीय ग्राहक दिन केवळ औपचारिकता म्हणून साजरा केला जात आहे. ग्राहकांपर्यंत त्यांचे सहा हक्क पोहोचविण्याऐवजी प्रशासकीय अधिकारी हे कार्यक्रम चार भिंतीच्या आतच मर्यादित ठेवत आहेत. यामुळे ग्रामीण भागातील ग्राहकांना त्यांची हक्कांची जाणीव होत नाही.”

ग्रामीण भागातील ग्राहक वंचित

ग्राहक पंचायतच्या कार्यकर्त्यांनी विशेषतः वाडी, तांडा, वस्ती, गाव आणि शहर भागातील ग्राहकांना त्यांच्या हक्कांची जाणीव करून देण्यासाठी प्रयत्न सुरू ठेवले आहेत. मात्र, सरकारी पातळीवरून कोणत्याही प्रकारचा ठोस सहभाग दिसून येत नाही.

या पार्श्वभूमीवर, ग्राहक पंचायतच्या पदाधिकाऱ्यांनी प्रशासनाकडून स्पष्ट खुलासा करण्याची मागणी केली आहे. त्यांनी मुख्यमंत्री, उपमुख्यमंत्री, अन्न व नागरी पुरवठा मंत्री, अन्न व औषध प्रशासन मंत्री, मुख्य सचिव आणि मंत्रालयातील इतर वरिष्ठ अधिकाऱ्यांना निवेदन पाठवून “ग्राहक हक्क दिन केवळ औपचारिकता न राहता, त्याला व्यापक जनजागृतीचे स्वरूप द्यावे” अशी मागणी केली आहे.

ग्राहक पंचायतच्या पदाधिकाऱ्यांनी जागतिक ग्राहक हक्क दिनाच्या कार्यक्रमाला उपस्थित न राहिलेल्या अधिकाऱ्यांवर प्रशासकीय आणि शिस्तभंगाच्या कारवाईची मागणी केली आहे. तसेच, “या अधिकाऱ्यांनी कार्यक्रमाला दांडी मारली असली तरी, त्यांनी खर्च झाल्याचे दाखवून शासनाच्या निधीचा अपव्यय केला आहे का?” याची चौकशी करण्याची गरज असल्याचे मत त्यांनी व्यक्त केले आहे.

सरकारकडून ठोस पावले उचलण्याची गरज

ग्राहक पंचायतने सरकारला आवाहन केले आहे की, “ग्राहक दिन फक्त बॅनर आणि फोटोसेशनपुरता मर्यादित ठेवू नये, तर तो खऱ्या अर्थाने ग्राहकांसाठी उपयोगी ठरेल अशा पद्धतीने साजरा केला जावा.” यासाठी शाळा-महाविद्यालये, ग्रामसभा आणि सार्वजनिक ठिकाणी ग्राहक जनजागृती कार्यक्रम राबविण्याची मागणी त्यांनी केली आहे.

ग्राहक पंचायतच्या या मागणीला प्रशासन कोणती प्रतिक्रिया देईल आणि यावर कोणती कारवाई केली जाईल, याकडे सर्वसामान्य ग्राहकांचे लक्ष लागले आहे.

_____________________________

________________________________