दै चालु वार्ता 
संजय राऊतांची घोषणा…
मुंबई: हिंदीसक्ती आणि त्रिभाषा सूत्रविरोधात ठाकरे बंधू मैदानात उतरले आहेत. राज ठाकरे पुरस्कृत मोर्चा 5 जुलैला तर 7 तारखेला उद्धव ठाकरे यांच्या उपस्थितीत मराठी समन्वय समितीच्या एल्गाराची घोषणा केली होती.
हिंदीसक्तीविरोधात ठाकरे बंधूंचे दोन वेगवेगळे मोर्चे काढण्याऐवजी एकत्रित एकच मोर्चा काढावा, यासाठी प्रयत्न सुरु होते. मनसे आणि ठाकरेंच्या शिवसेनेकडूनही एक मो यासाठी हालचाली सुरु होत्या. यानंतर आज ठाकरे गटाचे खासदार संजय राऊत यांनी मोठी घोषणा केली आहे. महाराष्ट्रतील शाळात हिंदीसक्ती विरोधात एकच आणि एकत्र मोर्चा निघेल, अशी एक्स पोस्ट संजय राऊत यांनी केली आहे. त्यामुळे हिंदीसक्तीविरोधात राज ठाकरे आणि उद्धव ठाकरे एकत्र येणार असल्याचं निश्चित झालं आहे.
मनसेचे नेते संदीप देशपांडे काय म्हणाले?
मला तर वाटतं, मराठी माणसाची एकत्र ताकद दिसणं गरजेचं आहे. राज ठाकरे यांनी काल आवाहन केलं होतं, त्याला समोरुन प्रतिसाद मिळाला. मराठी भाषेची गळचेपी आणि हिंदी भाषेचीसक्ती लादण्याचा प्रयत्न होतोय, त्याविरोधात मराठी माणसाने एकत्र येऊन आवाज उठवणे गरजेचे आहे. मराठी भाषा हा राजकीय मुद्दा नाही. मराठी भाषेपुढे कोणीही छोटं-मोठं नाही, सगळ्यांनी एकत्र आले पाहिजे. यासाठी राज ठाकरे सकारात्मक आहेत, आम्ही सगळे सकारात्मक आहोत. 5 जुलै रोजी हा मोर्चा एकत्रितपणे निघेल, अशी माहिती मनसेचे नेते संदीप देशपांडे यांनी एबीपी माझाशी बोलताना दिली.
ठाकरे गटाचे खासदार अरविंद सावंत काय म्हणाले?
ठाकरे बंधूंच्या एकत्र मोर्चावर ठाकरे गटाचे खासदार अरविंद सावंत म्हणाले की, यापूर्वी जेव्हा 19 एप्रिलला भारतीय कामगार सेनेच्या अधिवेशनापूर्वी राज ठाकरे यांनी यासंदर्भात वक्तव्य केले होते. त्यांनी मराठी माणसासाठी मी माझा व्यक्तिगत अहंकार बाजूला ठेवू शकतो, ते महाराष्ट्रापेक्षा मोठं नाही, त्याचं द्योतक पाहायला मिळत आहे. उद्धव ठाकरेंनी तेव्हा लगेच राज ठाकरेंना प्रतिटाळी दिली होती. मराठी भाषा, मराठी संस्कृती आणि महाराष्ट्र यांचं हित पाहणाऱ्यांना आपण बरोबर घेतलं पाहिजे आणि अहित करणाऱ्या लोकांना सोडून उभं राहिले पाहिजे. मध्यंतरीच्या काळात महाराष्ट्राचं अहित करणाऱ्यांनी विडा उचलला होता, त्यांनी बरेच प्रयत्न केले हा मोर्चा निघू नये, असं अरविंद सावंत म्हणाले.
शरद पवार गटाचे आमदार रोहित पवार काय म्हणाले?
मराठीसाठी दोन्ही भाऊ येऊ एकत्र येत असतील मराठी मनांसाठी हा अत्यंत आनंददायी क्षण असेल. मराठी माणूस आणि मराठीच्या अस्मितेसाठी एकत्र आल्यावर महाराष्ट्रद्रोह्यांना धडकी भरल्याशिवाय राहणार नाही यात कुठलीही शंका नाही. त्यामुळे मोर्चाच्या आधीच सरकारला नमते घ्यावे लागेल, असं शरद पवार गटाचे आमदार रोहित पवार यांनी म्हटलं आहे.
सामनाच्या फ्रंट पेजवर राज ठाकरे-
सामानाच्या पहिल्याच पानावर आज उद्धव ठाकरेंच्या पत्रकार परिषदेच्या फोटोच्या बाजूला राज ठाकरे यांच्या पत्रकार परिषदेचा फोटो छापून “राज ठाकरे यांनी दादाचा भुसा केला” अशी बातमी सामनाने आज छापली आहे. सामनाच्या पहिल्याच पानावर ठाकरे बंधूंचा आजूबाजूला फोटो छापून हिंदी सक्ती आणि त्रिभाषा सूत्र विरोधी आंदोलनाची बातमी देण्यात आली आहे. हिंदीसक्ती आणि त्रिभाषा सूत्रविरोधात उद्धव ठाकरेंच्या भूमिकेच्या अगदी बाजूला राज ठाकरेंची भूमिकेची बातमी सामनाने आज छापली आहे.
