दै चालु वार्ता 
अवैध वाहतूक करणाऱ्या वाहनांचे परवाने जागेवरच होणार रद्द…
नागपूर: गौण खनिजांची अवैध वाहतूक करताना सापडलेल्या वाहनांचे परवाने (परमिट) आता जागेवरच निलंबित किंवा रद्द केले जाणार आहेत. राज्यातील वाळू व इतर गौण खनिजांचे अवैध उत्खनन आणि वाहतूक रोखण्यासाठी महसूलमंत्री चंद्रशेखर बावनकुळे यांच्या निर्देशानुसार हा कठोर निर्णय घेण्यात आला आहे.
महसूल विभागाने यासंदर्भातील परिपत्रक बुधवारी जारी केले.
राज्यात मोठ्या प्रमाणावर होणाऱ्या वाळू आणि इतर गौण खनिजांच्या चोरीमुळे शासनाच्या महसुलाची आणि पर्यावरणाची मोठी हानी होते. शिवाय, या अवैध व्यवसायातून गुन्हेगारीसुद्धा वाढली आहे. कारवाईसाठी जाणाऱ्या शासकीय अधिकारी व कर्मचाऱ्यांच्या जिवाला धोका निर्माण झाल्याच्या घटना समोर आल्या आहेत. या पार्श्वभूमीवर आता महसूल विभागाकडून ही कठोर कारवाई केली जाणार आहे.
शासनाचा महसूल चूकविणे हा गंभीर गुन्हा असून, काही लोक जाणीवपूर्वक असा प्रयत्न करतात. त्यांना बचक बसावा यासाठी हा निर्णय घेतला आहे, असे बावनकुळे यांनी सांगितले.
तीन टप्प्यांत शिक्षा…
-पहिला गुन्हा असेल तर ३० दिवसांसाठी परवाना निलंबित करणे आणि वाहन अडकवून ठेवणे.
-दुसरा गुन्हा असेल तर ६० दिवसांसाठी परवाना निलंबित करणे आणि वाहन अडकवून ठेवणे.
-तिसरा गुन्हा असेल तर संबंधित वाहनाचा परवाना कायमस्वरूपी रद्द करणे आणि प्रादेशिक परिवहन प्राधिकरण मार्फत पुढील कारवाईसाठी वाहन जप्त करणे.
या वाहनांवर करडी नजर…
अवैध उत्खनन आणि वाहतुकीसाठी वापरले जाणारे ड्रील मशीन, जेसीबी व पोकलैंड, ट्रॅक्टर, ट्रॅक्टर ट्रॉली, हाफ बॉडी ट्रक, फुल बॉडी ट्रक, डंपर, ट्रॉलर, कॉम्प्रेसर, ट्रॉलर, बार्ज, मोटोराईज्ड बोट, एक्सकॅव्हेटर, मॅकेनाईज्ड लोडर यासारख्या सर्व प्रकारच्या वाहनांवर व साहित्यावरही कारवाई लागू असणार आहे
