“एक हात मदतीचा… टोरेंट पॉवरच्या रक्तदान शिबिराला उत्स्फूर्त प्रतिसाद; ३५० बाटल्या संकलित”

ठाणे जिल्हा ग्रामीण प्रतिनिधी- विकी जाधव

ठाणे : समाज आरोग्य आणि कल्याणाच्या दृष्टीने सातत्याने उपक्रम राबवणाऱ्या टोरेंट पॉवर कंपनीतर्फे भिंवंडी, शील,मुंब्रा,कळवा परिसरात शनिवारी भव्य रक्तदान शिबिराचे आयोजन करण्यात आले. या शिबिराला कर्मचाऱ्यांनी तसेच स्थानिक नागरिकांनी मोठ्या संख्येने प्रतिसाद दिला. या उपक्रमातून तब्बल ३५० रक्ताच्या बाटल्यांचे संकलन करण्यात आले असून हा उपक्रम अत्यंत यशस्वी ठरला.

कंपनीच्या ‘समुदाय सेवा उपक्रमाचा’ एक महत्त्वाचा भाग म्हणून हे शिबिर आयोजित करण्यात आले होते. विशेष म्हणजे या शिबिराचा मुख्य उद्देश थॅलसेमिया रुग्णांना मदत करणे हा होता. थॅलसेमिया तसेच इतर गंभीर आजारांवरील उपचारांसाठी शिबिरातून संकलित झालेले रक्त मोठ्या प्रमाणात उपयुक्त ठरणार आहे.

शिबिरात कंपनीच्या सर्व विभागांतील कर्मचाऱ्यांनी उत्साहाने सहभाग नोंदवला. अनेक प्रथमच रक्तदान करणाऱ्या दात्यांनाही या उपक्रमाचा आनंद आणि समाधान लाभले. रक्तदान केल्यानंतर अनेक दात्यांनी समाजहिताच्या कार्यात सहभागी होण्याचा अभिमान व्यक्त केला.

टोरेंट पॉवर ही केवळ वीजपुरवठा सेवा देणारी संस्था नसून समाजहितासाठी कार्य करणे ही आमची जबाबदारी आहे, अशा भावना कंपनीच्या वरिष्ठ अधिकाऱ्यांनी व्यक्त केल्या.

“थॅलसेमिया रुग्णांच्या उपचारासाठी आयोजित रक्तदान शिबिरात कर्मचाऱ्यांचा मोठ्या प्रमाणात सहभाग पाहून आम्हाला अत्यंत आनंद झाला. समाजकार्यात सातत्याने योगदान देण्याची आमची बांधिलकी भविष्यातही कायम राहील,” असे कंपनीच्या जनसंपर्क अधिकाऱ्यांनी सांगितले.

रक्तदान शिबिर शांत, सुस्थितीत आणि आरोग्य विभागाच्या नियमावलीनुसार पूर्ण झाले. उपस्थित वैद्यकीय पथकाने सर्व तपासण्या काटेकोरपणे पार पाडल्या.

टोरेंट पॉवरच्या या उपक्रमाचे सर्व स्तरांतून कौतुक होत असून भविष्यातही असे समाजहिताचे कार्यक्रम राबवण्याची अपेक्षा व्यक्त केली जात आहे.