पालघर प्रभाग 1-ब आणि वाडा प्रभाग 12 ची निवडणूक कार्यवाही तात्पुरती थांबवली

रवी राठोड पालघर

पालघर : राज्य निवडणूक आयोग, महाराष्ट्र यांनी २९ नोव्हेंबर २०२५ रोजी जारी केलेल्या आदेशानुसार न्यायालयीन अपील प्रलंबित असलेल्या स्थानिक स्वराज्य संस्थांसाठी सुधारित निवडणूक कार्यक्रम जाहीर केला आहे. या अद्ययावत कार्यक्रमानुसार काही ठराविक प्रभागांतील निवडणूक कार्यवाही सध्या स्थगित करण्यात आली आहे.

सुधारित निवडणूक कार्यक्रमानुसार पालघर नगरपरिषदेच्या प्रभाग क्रमांक 1-ब (सर्वसाधारण) येथील निवडणूक प्रक्रिया तात्पुरती थांबविण्यात आली आहे. मात्र नगराध्यक्ष पदाची निवडणूक तसेच इतर सर्व प्रभागांतील सदस्य पदांची निवडणूक पूर्ववत नियोजनानुसार २ डिसेंबर २०२५ रोजीच पार पडणार असल्याचे प्रशासनाकडून सांगण्यात आले आहे.

तत्सम निर्णय वाडा नगरपंचायतीतील प्रभाग क्रमांक 12 (सर्वसाधारण) बाबतही घेण्यात आला असून येथील निवडणूक प्रक्रिया देखील स्थगित ठेवण्यात आली आहे. तथापि नगराध्यक्ष पदासह उर्वरित प्रभागांतील निवडणुका निश्चित कार्यक्रमाप्रमाणे २ डिसेंबर २०२५ रोजी होणार आहेत.

न्यायालयीन प्रकरण अंतिम होईपर्यंत या दोन्ही प्रभागांतील निवडणूक प्रक्रिया थांबविण्यात आली असून, पुढील सूचना मिळाल्यानंतरच पुढील कारवाई करण्यात येणार आहे.