दैनिक चालु वार्ता 
दैनिक चालु वार्ता प्रतिनिधी गंगाखेड-प्रेम सावंत
गंगाखेड: तालुक्यातील मौजे दामपुरी येथील शिवारात दहा ते बारा मेंढपाळ वेगवेगळ्या ठिकाणी कळप करून अनेक वर्षापासून मेंढ्या सांभाळतात. यापैकी विठ्ठलराव बोबडे यांच्या मेंढ्या शिवारात विसाव्यासाठी थांबल्या असताना अचानक रात्री काही मेंढ्या आरडाओरड करत पाय खोडत असल्याचे विठ्ठलराव बोबडे यांच्या लक्षात आले.
पाहता पाहता त्या रात्रीमध्ये आठ ते दहा मेंढ्यांचा मृत्यू झाला. दुसऱ्या दिवशी परभणी येथील पशुवैद्यकीय अधिकाऱ्यांना ही माहिती कळविण्यात आली. परत दुसऱ्या रात्रीही काही मेंढ्या अशाच प्रकारे चक्कर येऊन पडू लागल्या.सकाळी कळपातील आणखी दहा मेंढ्या मृत अवस्थेत आढळून आल्या.
या घटनेची माहिती कळताच आम आदमी पार्टीचे परभणी जिल्हा उपाध्यक्ष सखाराम बोबडे पडेगावकर यांनी शुक्रवारी रात्री उशिरा घटनास्थळी भेट देऊन मेंढपाळांना दिलासा देत घटनास्थळावरूनच परभणी जिल्ह्याचे पशुधन विकास अधिकारी डॉ.आगाव यांच्याशी संवाद साधत मेंढपाळांच्या अडचणी सांगितल्या.
मेंढ्यांच्या मृत्यूचे प्रमाण रोखण्यासाठी एका पथकाची नियुक्ती करून उपचार करण्यात येतील अशी माहिती देत एका पथकाने घटनास्थळी भेट देऊन मृत झालेल्या मेंढ्याचा काही शारीरिक भाग वैद्यकीय तपासणीसाठी पुणे येथे प्रयोग शाळेत पाठवण्यात आले आहे.
हा रिपोर्ट आल्यानंतरच याचे मूळ कारण लक्षात येणार असल्याची माहिती डॉ. आगाव यांनी दिली.
दोन दिवसात सुमारे दीड लाख रुपयाचे नुकसान झाल्याने मेंढपाळ विठ्ठल बोबडे व त्यांचे कुटुंबीय भयभीत झालेले आहेत. या मेंढपाळांना शासन दरबारी पाठपुरावा करून वैद्यकीय मदत व नुकसानी बद्दल आर्थिक मदत मिळवून देण्याचे आश्वासन आम आदमी पक्षाचे जिल्हा उपाध्यक्ष सखाराम बोबडे पडेगावकर यांनी दिले.
