दै चालु वार्ता 
दैनिक चालु वार्ता
प्रतिनिधी गंगाखेड/प्रेम सावंत
*गंगाखेड*:उपविभागांतर्गत तहसील कार्यालय गंगाखेड येथे शुक्रवार दिनांक २८ जून २०२४ रोजी गंगाखेड तालुक्यातील सर्व मतदान केंद्रस्तरीय अधिकारी व पर्यवेक्षक यांची बैठक आयोजित करण्यात आली होती. सदर बैठकीस गंगाखेड तालुक्यातील सर्व मतदार केंद्रस्तरीय अधिकारी व पर्यवेक्षक यांची उपस्थिती होती. या बैठकीस कैलासचंद्र वाघमारे, तहसिलदार गंगाखेड यांनी मार्गदर्शन केले व पुनरिक्षण कार्यक्रमांतर्गत मतदान केंद्रस्तरीय अधिकारी यांनी करावयाच्या कार्यवाहीची माहिती दिली.
तसेच ०१ जुलै २०२४ या अर्हता दिनांकावर आधारित छायाचित्र मतदार यादीचा दुसरा विशेष संक्षिप्त पुनरिक्षण कार्यक्रमाची माहिती पत्रकार व राजकीय पक्ष यांना व्हावी म्हणून सर्व राजकिय पक्षाचे प्रतिनिधी व पत्रकार यांचे समवेत देखील बैठक आयोजीत करण्यात आली होती.
सदर बैठक जिवराज डापकर, मतदान नोंदणी अधिकारी यांचे अध्यक्षते खाली घेण्यात आली.
आगामी विधानसभा निवडणूकीच्या अनुषंगाने अधिकाधिक मतदारांची नोंदणी व्हावी या उद्देशाने भारत निवडणूक आयोगाने दिनांक ०९ जुलै २०२४ या अर्हता दिनांकावर आधारित छायाचित्र मतदार यादीचा दुसरा विशेष संक्षिप्त पुनरिक्षण कार्यक्रम जाहीर केलेला आहे. पुनरिक्षण कार्यक्रमांतर्गत दिनांक २५ जुन २०२४ ते २४ जुलै २०२४ या कालावधीत मतदान केंद्रस्तरीय अधिकारी (बी.एल.ओ) यांच्याव्दारे त्यांचे मतदार यादी भागामध्ये घरोघरी भेटी देवून मतदारांची पडताळणी करण्यात येणार आहे.
तसेच वरील कालावधीत नवमतदारांची नोंदणी केली जाणार असून, मतदार यादीतील दुबार नावांची व मयत मतदारांची नावे खात्री करुन वगळली जाणार आहेत. त्याचप्रमाणे मतदारांचे मतदार यादीमधील फोटो योग्य त्या कार्यपध्दतीचा अवलंब करुन अदयावत केली जाणार आहेत.
या शिवाय मतदान केंद्रांचे सुसूत्रीकरण, प्रमाणीकरण व तपासणी देखील करण्यात येणार आहे. मतदार यादी विशेष संक्षिप्त पुनरिक्षण कार्यक्रमानुसार एकत्रिकृत प्रारूप मतदार यादी दिनांक २५ जुलै २०२४ रोजी प्रसिध्द केली जाणार आहे. तसेच २५ जुलै ते ९ ऑगस्ट २०२४ या कालावधीत दावे व हरकती स्विकारल्या जाणार असून या कालावधीत शनिवारी व रविवारी दावे व हरकती स्विकारण्यासाठी विशेष मोहीम देखील राबविली जाणार आहे. दावे व हरकती निकाली काढण्याची मुदत १९ ऑगस्ट २०२४ पर्यंत राहणार असून, २० ऑगस्ट २०२४ रोजी मतदार यादीची अंतिम प्रसिध्दी केली जाणार आहे.
या मोहिमेत ०१ जुलै २०२४ रोजी वयाची १८ वर्षे पुर्ण करणारे सर्व नागरिक मतदार म्हणून मतदार यादीत नावे नोंदविण्यासाठी पात्र ठरणार आहेत.
मतदार यादी पुनरिक्षण कार्यक्रमांतर्गत मतदार म्हणून नावे नोंदणी न झालेल्या व अदयाप मतदार म्हणून नोंदणी न केलेल्या नागरिकांना छायाचित्र मतदार यादीच्या विशेष पुनरिक्षण कार्यक्रमांतर्गत आपले नाव मतदार म्हणून नोंदविता येणार आहे. राजकिय पक्षांनी प्रत्येक मतदान केंद्रावर बिएलओ स्तरावर एजंट नेमणूक करावा असे जिवराज डापकर, मतदान नोंदणी अधिकारी तथा उपविभागीय अधिकारी गंगाखेड यांनी या प्रसंगी सूचीत केले.
गंगाखेड विधानसभा मतदार संघातील गंगाखेड, पालम व पूर्णा तालुक्यातील १८ वर्ष पूर्ण झालेल्या सर्व नागरिकांनी या मोहिमेत सहभागी होवून, मतदार यादीमध्ये नांव नोंदणी करुन घ्यावी असे आवाहन मतदार नोंदणी अधिकारी तथा उपविभागीय अधिकारी गंगाखेड यांच्या वतीने करण्यात आले आहे.
