
14 गुन्हे तरी ‘लाडकी बहीण’चा अध्यक्ष
मस्साजोगचे सरपंच संतोष देशमुख हत्या प्रकरणात दररोज नवीन माहिती समोर येत आहे. या प्रकरणाशी संबंधित असलेल्या खंडणीच्या गु्न्ह्यात वाल्मिक कराड याला अटक करण्यात आली आहे. वाल्मिक कराडवर अनेक गंभीर आरोप सुरू आहेत
कराडशी संबंधित अनेक खुलासेही होत आहेत. वाल्मिक कराडवर 14 गुन्हे असतानाही त्याला परळीतील लाडकी बहीण योजना समितीच्या अध्यक्षपदी नेमण्यात आल्याची बाब समोर आली आहे.
वाल्मिक कराड हा राज्याचे मंत्री आणि राष्ट्रवादीचे नेते धनंजय मुंडे यांचा निकटवर्तीय समजला जातो. याच कारणाने संतोष देशमुख हत्या प्रकरणाचा तपास सुरू असताना मुंडे यांना मंत्रिमंडळात समावेश करू नये अशी मागणी करण्यात येत आहे. तर, दुसरीकडे वाल्मिक कराडभोवती कायदेशीर कारवाईचा फास घट्ट होत चालला आहे.
वाल्मिकची नियुक्ती कोणाच्या शिफारसीवरून?
गंभीर गुन्हे दाखल असलेला वाल्मिक कराड हा मुख्यमंत्री माझी लाडकी बहीण योजनेच्या परळी मतदारसंघाच्या समिती अध्यक्षपदी असल्याचे समोर आले आहे. तत्कालीन पालकमंत्री धनंजय मुंडे यांच्या शिफारशीवरून झाली होती. कराडवर गुन्हे दाखल असताना लाडकी बहीण योजनेवर घेतलेच कसे, अशी चर्चा सुरू झाली आहे.
केज तालुक्यातील मस्साजोग येथे पवनचक्कीचे काम करणाऱ्या आवादा कंपनीचे कार्यालय आहे. येथीलच एका अधिकाऱ्याला 2 कोटी रुपयांची खंडणी मागण्यात आली होती. या प्रकरणी केज पोलीस ठाण्यात वाल्मिक कराड याच्यासह विष्णू चाटे, सुदर्शन घुले या तिघांविरोधात गुन्हा दाखल झालेला आहे.
समितीमध्ये कोणाचा समावेश?
तत्कालीन पालकमंत्री धनंजय मुंडे यांच्या शिफारशीनुसार जिल्ह्यातील सहा मतदारसंघांत एक समिती तयार केली. त्याप्रमाणे परळी मतदारसंघाच्या समिती अध्यक्षपदी वाल्मिक कराड याची नियुक्ती झाली. त्याशिवाय, इतर दोन अशासकीय सदस्य आणि काही अधिकारी, कर्मचारीही या समितीचे सदस्य आहेत. लाडकी बहीण योजनेसह जिल्हा नियोजन समितीवरदेखील वाल्मिक कराड सदस्य असल्याचे समोर आले आहे. कराडच्या अटकेनंतरही तो समितीवर कायम आहे का, याची माहिती समोर आली नाही.
सीआयडीचा तपास सुरू….
दरम्यान, मस्साजोगचे सरपंच संतोष देशमुख हत्या प्रकरणी कारवाईला वेग आला आहे. पोलिसांनी आतापर्यंत एकूण 8 आरोपींना अटक केली आहे. कृष्णा आंधळे एकमेव आरोपी फरार आहे. वाल्मिक कराडवर खंडणीचा गुन्हा दाखल करण्यात आला आहे. खंडणी प्रकरणात वाल्मिक कराडने पवनचक्की कंपनीच्या अधिकाऱ्यांशी फोनवरून संवाद साधला होता, अशी कबुली काही दिवसांपूर्वी विष्णू चाटे यानं दिली होती. आता या प्रकरणात वाल्मिक कराडभोवती कारवाईचा फास आणखी घट्ट होण्याची शक्यता आहे.