महाराष्ट्राचा ‘तालिबानीकरण’ रोखण्यासाठी तरुणांनी पुढे या – हर्षवर्धन सपकाळ.  जय जवान अभियानाच्या बैठकीत सत्ताधाऱ्यांवर जोरदार हल्लाबोल.

दैनिक चालु वार्ता उदगीर प्रतिनिधी-अविनाश देवकते

लातूर (उदगीर) : देशभरातील तरुणांना एकत्रित करून सत्ताधाऱ्यांच्या अन्यायकारक धोरणांविरोधात लढा उभारण्यासाठी काँग्रेसने ‘जय जवान’ अभियानाची सुरुवात केली आहे. या अभियानाच्या पार्श्वभूमीवर गांधी भवन, मुंबई येथे काँग्रेस प्रदेशाध्यक्ष हर्षवर्धन सपकाळ यांनी राज्यातील प्रमुख समन्वयकांची बैठक घेतली.

या बैठकीत सपकाळ यांनी सरकारवर जोरदार हल्ला चढवत महाराष्ट्राच्या ‘तालिबानीकरणा’चा इशारा दिला.

राज्यातील वातावरण धोकादायक – सरकार जनता दडपण्याचा प्रयत्न करतंय!

प्रदेशाध्यक्ष हर्षवर्धन सपकाळ यांनी स्पष्ट शब्दांत सरकारवर ताशेरे ओढले. ते म्हणाले,

“राज्यात जातीय आणि धार्मिक विद्वेषाचे राजकारण वाढवले जात आहे. अभिव्यक्ती स्वातंत्र्यावर निर्बंध लादले जात आहेत. सरकारला महाराष्ट्राचा तालिबान करायचा आहे का? सत्ताधारी हुकूमशाही पद्धतीने सत्ता उपभोगत आहेत. महाराष्ट्राची ही स्थिती कुठे नेईल, याचा विचार तरुणांनी केला पाहिजे!”

त्यांनी ठाम भूमिका मांडली की, “छत्रपती शिवाजी महाराजांचे स्वराज्य आणि डॉ. बाबासाहेब आंबेडकरांचे संविधान डोळ्यासमोर ठेवून महाराष्ट्रातील तरुणांनी आता झोपेतून जागे झाले पाहिजे. अन्यायाविरोधात उभे राहिले पाहिजे!”

सरकारचा ‘करलूट’ आणि बेरोजगारीचा विळखा – कोण जबाबदार?

जय जवान अभियान लातूर जिल्ह्याचे प्रमुख समन्वयक विवेक पंडितराव जाधव यांनी सरकारच्या धोरणांवर सडकून टीका केली. ते म्हणाले, “सरकार बेरोजगार तरुणांना अंधारात ढकलत आहे. त्याच वेळी सामान्य जनतेला करांच्या माध्यमातून लुटले जात आहे. लोकांना मूलभूत सुविधा न देता सरकारचा खिसा भरला जात आहे. तरुणांनी आता मूर्ख बनून राहू नये. या सरकारच्या विरोधात लढा उभा केला पाहिजे!”

तरुणांनी मैदानात उतरावे – ‘जय जवान’ अभियानाचा निर्धार

यावेळी जाधव यांनी स्पष्ट केले की, “तरुणांनी राजकीय सडलेल्या व्यवस्थेविरोधात बंड पुकारले पाहिजे. जनतेला केंद्रस्थानी ठेवून पुरोगामी विचारांचे राजकारण पुढे नेण्यासाठी सुशिक्षित तरुणांनी पुढे यावे. जय जवान अभियान हे केवळ काँग्रेससाठी नाही, तर हा समाजाच्या न्यायासाठी उभा राहण्याचा लढा आहे!”

लातूर जिल्ह्यातील तरुणांसाठी विशेष आवाहन

या अभियानाचा भाग होण्यासाठी लातूर जिल्ह्यातील तरुणांनी ९७६६८८३५५५ या क्रमांकावर संपर्क साधावा, असे आवाहन करण्यात आले आहे.

—————————————

तरुणांनी आता पुढे नाही आले, तर महाराष्ट्राचं भविष्य अंधारात!

“जर आजच्या तरुणांनी डोळे झाकून फक्त पाहत राहायचं ठरवलं, तर उद्या त्यांचा देशच उरेल की नाही, याची खात्री नाही! सरकारच्या दडपशाहीविरोधात आता तरुणांनीच पेटून उठले पाहिजे!”, असा कडक संदेश जय जवान अभियानाच्या बैठकीत देण्यात आला.