दै चालु वार्ता 
दैनिक चालु वार्ता उदगीर प्रतिनिधी -अविनाश देवकते
कुक्कुटपालन प्रशिक्षणातून ग्रामीण महिलांना स्वावलंबनाची संधी
________________________________
लातूर (उदगीर) : महाराष्ट्र पशु व मत्स्य विज्ञान विद्यापीठ, नागपूर आणि राष्ट्रीय मांस संशोधन संस्था, हैद्राबाद यांच्या संयुक्त विद्यमाने परसबागेतील कुक्कुटपालन प्रशिक्षण कार्यक्रम दिनांक १६ मार्च २०२५ रोजी पशुवैद्यक व पशुविज्ञान महाविद्यालय, उदगीर येथे संपन्न झाला. या प्रशिक्षणामध्ये महिलांना आर्थिक स्वावलंबनाच्या दृष्टीने विविध मार्गदर्शनपर सत्रे आयोजित करण्यात आली.
महिला सशक्तीकरणासाठी कुक्कुटपालन एक प्रभावी माध्यम – डॉ. अनिल भिकाने
कार्यक्रमाचे उद्घाटन प्रमुख पाहुणे तथा उद्घाटक प्रा. डॉ. अनिल भिकाने (संचालक, विस्तार शिक्षण, महाराष्ट्र पशु व मत्स्य विज्ञान विद्यापीठ, नागपूर) यांच्या हस्ते झाले. आपल्या उद्घाटनपर भाषणात डॉ. भिकाने यांनी सांगितले की, “महिला सशक्तीकरणासाठी कुक्कुटपालन हे एक उत्तम आर्थिक साधन ठरू शकते. अल्प भांडवलात सुरू करता येणारा हा व्यवसाय ग्रामीण महिलांना आर्थिक सक्षम बनविण्यास मदत करतो. या प्रशिक्षणाच्या माध्यमातून महिलांनी आत्मनिर्भरतेकडे वाटचाल करावी.”
महाविद्यालयाचे योगदान आणि प्रशिक्षणाचा उपयोग – डॉ. नंदकुमार गायकवाड
कार्यक्रमाच्या अध्यक्षस्थानी पशुवैद्यक व पशुविज्ञान महाविद्यालयाचे सहयोगी अधिष्ठाता प्रा. डॉ. नंदकुमार गायकवाड होते. आपल्या अध्यक्षीय भाषणात त्यांनी महाविद्यालयामार्फत सातत्याने आयोजित होणाऱ्या विविध प्रशिक्षणांचा जास्तीत जास्त लाभ परिसरातील पशुपालकांनी घ्यावा असे मार्गदर्शन केले.
सदर प्रशिक्षण कार्यक्रमाचे समन्वयक डॉ. राम कुलकर्णी यांनी शिबिराचे प्रास्ताविक करत कुक्कुटपालन क्षेत्रातील नवकल्पना, व्यवसायाचे महत्त्व, आर्थिक फायदे, आणि व्यावसायिक संधी यावर सखोल माहिती दिली.
प्रशिक्षण सत्रांमध्ये विविध मान्यवरांनी उपस्थित प्रशिक्षणार्थींना मार्गदर्शन केले.
प्रमुख मार्गदर्शक:
डॉ. मत्स्यगंधा पाटील – कुक्कुटपालनातील आधुनिक तंत्रज्ञान
डॉ. संभाजी चव्हाण – परसबाग कुक्कुटपालन आणि त्याचे फायदे
डॉ. राम कुलकर्णी – व्यवसायाचा विस्तार आणि आर्थिक नियोजन
डॉ. प्रफुल्ल पाटील – पोषण आणि आरोग्य व्यवस्थापन
———————
कार्यक्रमात सहभागी झालेल्या प्रशिक्षणार्थींना प्रशिक्षणाचे प्रमाणपत्र आणि कुक्कुटपालनासाठी आवश्यक साहित्याचे मोफत वाटप करण्यात आले.
कार्यक्रमाचे सूत्रसंचालन पदव्युत्तर विद्यार्थी डॉ. वेदांत पांडे यांनी केले. डॉ. नरेंद्र खोडे, डॉ. शरद आव्हाड, डॉ. विवेक खंडाईत आणि डॉ. प्रकाश घुले यांनी सहसमन्वयक म्हणून भूमिका पार पाडली.
कार्यक्रमाच्या शेवटी डॉ. प्रकाश घुले यांनी उपस्थितांचे आभार मानले. तसेच डॉ. विनोद जाधव, डॉ. ओम होळकर आणि कौशल मोरे यांनी कार्यक्रमाच्या यशस्वी आयोजनासाठी विशेष सहकार्य केले.
ग्रामीण महिलांसाठी नवा रोजगाराचा मार्ग
सदर प्रशिक्षणामुळे ग्रामीण महिलांना स्वावलंबनाची संधी मिळणार असून कुक्कुटपालन व्यवसायातून आर्थिक स्थैर्य प्राप्त करता येईल. महाविद्यालयाच्या पुढाकारामुळे अनेक महिला आणि लघु उद्योजक या क्षेत्रात आपले भविष्य घडविण्यास उत्सुक आहेत. महिला सशक्तीकरणासाठी अशा उपक्रमांचे महत्त्व अनन्यसाधारण आहे, असे मत सहभागी प्रशिक्षणार्थींनी व्यक्त केले.
