अर्धा महिना संपला तरी धान्य काही मिळेना !  गरीब आणि रोजंदारी कामगार उपासमारीच्या संकटात.

दैनिक चालु वार्ता उदगीर प्रतिनीधी – अविनाश देवकते 

लातूर (उदगीर) : जळकोट तालुक्यातील अतनूर परिसरातील २८ गाव, वाडी, तांडा आणि वस्त्यांमध्ये राहणाऱ्या रेशनकार्ड धारकांना अजूनही स्वस्त धान्य मिळालेले नाही. यंदाच्या महिन्यात १६ मार्च उलटूनही कोणत्याही राशन दुकानातून धान्याचे वाटप झालेले नाही, त्यामुळे गरीब आणि गरजू लाभार्थी मोठ्या अडचणीत सापडले आहेत.

धान्य वितरणास विलंब का?

राशन दुकानदारांकडून मिळालेल्या माहितीनुसार, सरकारच्या ऑनलाइन वितरण योजनेत तांत्रिक अडचणी उद्भवल्यामुळे धान्य वितरणाची प्रक्रिया ठप्प झाली आहे. रास्त भाव दुकानांवर असलेल्या पॉश मशीन वर धान्य वितरणाची नोंद झालेली नाही, त्यामुळे अद्याप वितरण सुरू करता आलेले नाही.

पुरवठा विभागाने या महिन्यापासून रेशनकार्ड धारकांसाठी ई-केवायसी अनिवार्य केली आहे. यासोबतच शासनाचे मोफत धान्य किट आणि शंभर रुपयांमध्ये आनंदाचा शिधा योजनेच्या अंमलबजावणीमुळे या महिन्यात धान्य वितरण प्रक्रिया कोलमडली आहे. या सर्व अडचणींमुळे नियमित धान्य पुरवठा लांबणीवर पडला आहे.

रोजंदारी कामगारांना उपासमारीची वेळ

राशन दुकानातून मिळणाऱ्या स्वस्त धान्यावर अनेक गरीब कुटुंबांचा उदरनिर्वाह अवलंबून असतो. विशेषतः, रोजंदारी मजूर, शेतमजूर आणि आर्थिक दृष्ट्या दुर्बल कुटुंबांना याचा मोठा फटका बसत आहे.

या महिन्यात धान्य न मिळाल्यामुळे अनेक मजुरांना उपासमारीची वेळ आली आहे. त्यांच्यासाठी रेशनचे धान्य हे जीवनावश्यक असूनही शासनाच्या यंत्रणेमुळे त्यांना अजूनही वाट पाहावी लागत आहे.

पुरवठा विभागाच्या दुर्लक्षामुळे नागरिक संतप्त

पुरवठा विभागाच्या नियमानुसार, प्रत्येक महिन्याच्या १ ते ७ तारखेपर्यंत रास्त भाव दुकानांमध्ये धान्य पोहोचले पाहिजे आणि त्यानंतर त्याचे वितरण सुरू व्हावे. मात्र, यंदा १६ तारीख उलटली तरीही दुकानांमध्ये धान्य उपलब्ध झालेले नाही.

यासंदर्भात तालुका आणि जिल्हा पुरवठा अधिकाऱ्यांना संपर्क साधण्याचा प्रयत्न केला असता, त्यांनी कोणताही स्पष्ट प्रतिसाद दिला नाही. यामुळे स्थानिक नागरिक आणि रेशनकार्ड धारकांमध्ये तीव्र नाराजी पसरली आहे.

ग्राहक संरक्षण परिषदेची मागणी

या परिस्थितीची गंभीर दखल घेत ग्राहक पंचायत महाराष्ट्र राज्याचे जिल्हा संघटक तथा ग्राहक संरक्षण परिषदेचे शासन नियुक्त सदस्य बालासाहेब गोविंदराव शिंदे यांनी संबंधित अधिकाऱ्यांकडे त्वरित उपाययोजनांची मागणी केली आहे. त्यांनी जिल्हा पुरवठा अधिकारी, सचिव आणि जिल्हाधिकारी यांच्याकडे खालील मागण्या केल्या आहेत:

1. पॉश मशीन आणि ई-केवायसी यंत्रणा त्वरित सुरळीत करावी.

2. दरमहा वेळेवर धान्य वितरण करावे.

3. धान्य वितरणास विलंब होऊ नये यासाठी पुरवठा विभागाने ठोस उपाययोजना कराव्यात.

4. प्रत्येक लाभार्थ्याला धान्य वितरणाची पावती देण्यात यावी.

शासनाने त्वरित हस्तक्षेप करावा

अतनूर परिसरातील नागरिक आणि ग्राहक संघटनांनी या परिस्थितीवर त्वरित तोडगा काढण्यासाठी शासनाने हस्तक्षेप करावा अशी मागणी केली आहे. गरिबांच्या हक्काचे धान्य वेळेवर न मिळाल्यास मोठ्या प्रमाणावर जनआंदोलन उभे राहण्याची शक्यता आहे.

नागरिकांची अपेक्षा – लवकरात लवकर धान्य वाटप सुरू व्हावे 

रोजंदारीवर जगणाऱ्या कुटुंबांसाठी हे धान्य जीवन-मरणाचा प्रश्न बनला आहे. त्यामुळे पुरवठा विभागाने तत्काळ लक्ष घालून स्वस्त धान्याचे वितरण सुरू करावे, अशी सर्वसामान्यांची मागणी आहे. आता पाहावे लागेल की शासन या समस्येवर किती लवकर तोडगा काढते!