माऊलींच्या 750 व्या जन्मोत्सवाचे पंतप्रधान मोदी आणि योगी आदित्यनाथांना निमंत्रण !

आळंदी: श्रीज्ञानेश्वर महाराज संस्थान कमिटी व आळंदी देवाची ग्रामस्थांच्या वतीने श्रीसंत ज्ञानेश्वर महाराजांच्या 750 व्या जन्मोत्सवाचे (सप्तशतकोत्तर सुवर्ण महोत्सव) आयोजन करण्यात आले आहे.

या कार्यक्रमासाठी प्रमुख पाहुणे म्हणून पंतप्रधान नरेंद्र मोदी आणि उत्तर प्रदेशचे मुख्यमंत्री योगी आदित्यनाथ यांना निमंत्रण पाठविण्यात आले आहे.

श्रीज्ञानेश्वर महाराज संस्थान कमिटी व आळंदी देवाची ग्रामस्थांच्या वतीने 3 मे 10 मे या कालावधीत जन्मोत्सव साजरा करण्यात येणार आहे. कार्यक्रमाला मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे आदी उपस्थित राहणार आहेत. पंतप्रधान मोदी यांच्या कार्यालयाकडून कार्यक्रमाला उपस्थित राहण्याबाबत सकारात्मक प्रतिसाद मिळाला आहे. पण, अद्याप तारीख आणि वेळ निश्चित झालेली नाही.

पंतप्रधान नरेंद्र मोदी यांना श्रीसंत ज्ञानेश्वर महाराजांच्या 750 व्या जन्मोत्सवाचे निमंत्रण देण्यात आले आहे. येत्या आठवडाभरात पंतप्रधान कार्यालयाकडून तारीख आणि वेळ निश्चित होईल. त्यानंतर अधिकृतपणे कार्यक्रमाची रूपरेषा जाहीर केली जाईल, असे आळंदी देवस्थानचे प्रमुख विश्वस्त योगी निरंजननाथ, विश्वस्त डॉ. भावार्थ देखणे, विश्वस्त अ‍ॅड. राजेंद्र उमाप यांच्या कमिटीतर्फे सांगण्यात आले आहे.